Den luna di augustus Conseho di Minister di Reino na Den Haag a reuni pa trata riba e topico di aanwijzing pa Aruba. Nan a duna Aruba un zienswijze, di cual gobierno mester a pone tur aspecto pa kico no ta di acuerdo cu conseho di CAft. Gobierno a haya un deadline pa haci esey, di cual segun minister presidente durante conferencia di prensa nan a cumpli cu esaki.
mr. Evelyn Wever-Croes, minister presidente, a informa cu dia 5 di september nan a manda e zienswijze, cual tabata e fecha cu nan a haya pa manda esaki. Hulanda a confirma di ricibi esaki, pero no a cuminsa cu un dialogo riba dje. E mandatario a indica di no por duna un update riba e zienswijze.
Tambe cu riba e agenda di Conseho di Minister di Reino na Den Haag no ta poni pa trata e zienswijze riba diabierna di aki dos siman, esta dia 30 di september. Pero nan lo trata e zienswijze di Aruba den luna di october.
El a sigui indica di ta kere cu Parlamento di Aruba no mester haya un inzage di e zienswijze. Oposicion a pidi esaki caba, pero segun minister presidente, el a splica nan dje problema cu e tin ta cu minister Glenbert Croes tabata hopi habri den un di e ultimo reunionnan cu parlamento. Segun Wever-Croes, minister Glenbert Croes a confia e parlamentarionan y a duna informacion. E mandatario a indica e informacionnan aki e mes no lo a duna. “No ta tur parlamentario tabata sa di a haci bon uzo di esaki”, minister presidente a indica. N’e momentonan aki e ta algo entre gobierno cu gobierno y no ta algo cu parlamento tin un rol ainda. Pero asina cu gobierno sinti cu parlamento mester haya un rol den esaki, nan lo envolve parlamento, tabata e palabranan di mr. Evelyn Wever-Croes.
