Minister Plenipotenciario Suplente mr. Ady Thijsen a reuni cu burgemeester di Maastricht mr. Annemarie Penn-te Strakke. Thijsen durante e combersacion a bisa cu su plan como minister ta pa bishita e municipionan (gemeente) grandi di Hulanda y cu e ta mira un significacion grandi pa estrecha e lasonan entre Aruba y e municipionan. Segun Thijsen como meta pa Aruba ta visibel pa un y tur na Hulanda.
Durante di e combersacion a bini algun temanan dilanti cu por conduci na un forma di cooperacion entre Aruba y Maastricht. E mandatario a splica cu turismo ta e pilar economico principal di Aruba y esey na mes momento ta haci e isla vulnerabel, manera durante e pandemia y tambe e sucedido di 9/11 na New York y Washington. P’esey segun Thijsen, Aruba ta en busca di otro actividadnan economico pa diversifica su economia. Mirando cu actualmente turismo ta un pilar economico importante pa Aruba e mandatario a papia cu burgemeester Penn-te Strakke riba e posibilidadnan di intercambio entre e sector di turismo di EPI cu e Hotelvakschool di Maastricht.
Tambe minister Thijsen a bisa cu e guera na Ucrania tambe tin su efecto pa e tarifanan di awa y coriente na Aruba. Aruba ta busca na manera pa bin cu energia duradero, manera LNG gas y tambe turbina di biento. E echo cu e frontera cu Venezuela te ainda ta cera, tambe tin su efecto riba e prijsnan di berdura y fruta. P’esey segun minister Thijsen lo mester sigui na sondea posibilidad pa Aruba mes por produci cierto berdura pa e mercado local y e hotelnan.
Minister Thijsen a toca cu burgemeester Penn-te Strakke e tema di innovacion. Aki e burgemeester a bisa cu Maastricht ta dispone di asina yama Brightlands Maastricht Health Campus unda riba diferente tereno tin actividad innovativo ta tuma luga y cu por ta interesante pa Aruba. Durante e combersacion e mandatario a puntra burgemeester Penn-te Strakke riba ki maneho Maastricht ta hiba riba e tereno di integridad, mirando cu e tema aki ta un prioridad grandi pa Gobierno di Aruba. Penn-te Strakke a bisa cu e punto aki tambe ta halto riba agenda di Maastricht. Ambtenaarnan di Maastricht y Provincia Limburg pa medio di un video ta ricibi informacion riba e definicion di integridad.
Riba e tereno di cultura a bin dilanti un idea pa bin cu un exposicion riba Carnaval, cu ta un aspecto cultural cu ta biba tanto na Maastricht como na Aruba. Segun Thijsen un proyecto asina por yuda intercambia e conocemento entre Maastricht y Aruba y resto di Hulanda.
Na final a haci e palabracion cu riba algun tereno lo bin consulta riba nivel ambtelijk pa concretisa e plannan di cooperacion entre Aruba y Maastricht.
Minister Thijsen a gradici burgemeester Penn-te Strakke pa e recepcion y combersacion hopi ameno pa despues intercambia regalo como recuerdo di e bishita di minister Thijsen na e burgemeester di Maastricht.
