E ta duna hende miedo, mas pasobra no por haci nada. Pero e berdad ta cu e grupo di adicto ambulante, conoci como choller, ta poderando di centro di ciudad.
Ayera e personanan cu ta custumbra di bay den area di centro di ciudad a constata cu un di e mashinnan di Aruparking a disparce. No ta conoci si ta Aruparking a bay cu ne por completo of a hort’e. Haciendo investigacion a bin haya sa cu un choller den ora di marduga a dicidi cu contenido di e mashin ey ta p’e.
E adicto a ambulante (rond di 5:00 AM bay ariba) a yega cu su ras riba lomba, manera ta shopping e ta bay, y cu un herment cu ta parce un pat’i cabra. El a suta e mashin cu esaki pa trata di saca e contenido. Pero ta parce cu e no a logra, y a dicidi, como cu tabata birando cla, a dicidi di bay cu e mashin completo.
Informacion por a compronde cu ta aña pasa a haci un inversion basta grandi pa cambia motherboard di tur e mashinnan. Y si cu ta haci debido uzo di esaki. Ta mustra cu ta placa tira afo. Y awo ta parce cu ta e chollernan si ta saca probecho. Parce, segun informacion no oficial, tin un otro mas cu a sufri daño. A trata di haya contacto cu Aruparking pero e hefe no a traha diamars y ta bek na trabou diaranson.
Centro di ciudad ta den noticia ultimo simannan pasobra comerciantenan a bin ta pidi ayudo. Nan no por mas cu choller- y ladronnan. Tur ta horta nan di dia y anochi. Nan ta keda cu hopi gasto atras di perdida di mercancia of pa drecha nan negoshi bek, manera Win Me.
Den video cu a haya por a tuma nota cu den careda di 2:00 PM pa mainta, prome cu solo sali, e choller y ladronnan ta manera riba un shopping spree den centro di ciudad. Loke cu nan haya ta horta bay cu ne y no pa nan mes pero pa bende. Y manera bisa, e actonan aki ta cabando cu comercio den centro di ciudad.
