For di 2017 nos pais a pasa traves di dos crisis nunca bisto den nos historia. E crisisnan cu por a kibra nos pais, pero no Aruba. No, Aruba ta un pais resiliente y dicidido pa triunfa y bay dilanti “cueste loke cueste.” Horcan Mike Eman a laga Aruba na rudia y na e rand di bancarota cu un Megadebe di 90% di nos GDP.
Horcan Mike Eman a subi e pago di interes riba nos debe nacional di 110 miyon pa 260 miyon pa aña. Na PPP Proyecto Mike Eman a subi esaki te na 96.5 miyon adicional pa aña. Despues di apenas 3 aña di gobernacion (2017-2018) e pandemia a bin y nos economia a cay por completo.
Nos economia a cay, pero no nos perseverancia ni nos curashi
A pesar di e retonan, e decisionnan concreto y decisivo cu gobierno a tuma rapidamente a salba y a yuda nos pais recupera y bons bek mas cu cualkier pais den Caribe y hasta den mundo. (IMF) Hunto cu e trabao duro di nos pueblo y e enfoke pa reconstrui nos hogarnan y pais, awe nos por wak bek con rapido y cuanto nos a avansa.
Recapitulacion di e logronan concreto di gobierno di Aruba den e ultimo aña (2023-2024)
A pesar di e crisisnan mester keda pone enfasis riba e logronan di gobierno, pasobra e tendencia ta pa critica so. Critica ta bon, e ta tene tur hende skerpi pero e mester ta honesto si. Nos politica mester madura y reconoce ora algo ta bon y duna esaki elogio tambe. Den cuadro di esaki mi ta bay comparti algun di e tantisimo logronan di gobierno di Aruba:
1. CAft, e supervision financiero oficial di Aruba a declara den rapportnan di 2023-2024, den Parlamento y ruedanan di prensa, cu Gobierno ta cumpliendo cu e normanan di CAft, a baha su gastonan cualnan awo ta na un nivel aceptabel, a entrega presupuesto na tempo, ta produci un 1% surplus.
2. Pa di dos aña consecutivo Banco Central di Aruba ta keda publica cu nos economia a bons bek fuertemente y ta bayendo hopi bon. BCA ta hopi positivo y ta subraya e forsa di nos Turismo.
3. FITCH a subi Aruba su rating pa BB+. Esaki ta otro evidencia mas cu Aruba ta recuperando y bayendo den bon direccion! E rating aki ta un señal berde pa reputacion y credibilidad di nos pais.
4. Na 2023 a pronostica cu nos economia lo crece 10.1% pero en realidad a crece 13.6%! Esaki ta 3.5% mas cu tabat pronostica, y un total di 26% mas cu tabata spera.
5. Ta pagando ya dos aña consecutivamente riba nos debe nacional cu e surplus.
6. Debe a baha na 83% danki na crecemento di nos GDP y e pagonan riba debe.
7. Carnival Cruises lo trece 30% mas turista pa Aruba na 2024.
8. Varios aerolinea a anuncia expansion di vuelonan diario y semanal pa Aruba.
9. Turismo ta kibrando record tur luna desde 2023 te cu aworaki danki na e vision di gobierno.
10. Aruba ta kita di e lista “gris” y awo ta riba e lista “blanco.” Esaki ta un logro grandi pa e reputacion di nos pais y lo por atrae mas inversionista.
11. Pensioen a subi continuamente pa Gabinete Wever-Croes. Na 2024 esaki lo subi cu 4% atrobe. For di 2017-2023 Pensioen a crece af.182.- pa esunnan casa y afl.108.- pa soltero.
12. Prima di AZV pa pensionado lo baha cu 1.5%.
13. Minimumloon a subi na afl.1986.20 na 2024.
14. Desempleo a baha na un cifra record di 4.3%
15. Cantidad di cupo di empleo a subi cu 5.1%, cu ta significa cu negoshinan ta prosperando y emplea mas persona.
16. Inflacion na 2023 tabata 3.4%, hopi abao compara cu resto di mundo.
17. Nos GDP a crece di 5.2 Biyon pa 5.5 biyon florin.
18. Na 2024 Gobierno lo inverti 10.4 miyon na drechamento di caretera.
19. Gobierno a logra baha cantidad di camber di hotel di AVP, di 7 mil pa poco menos di 2 mil.
20. AZV y SVB tin surplus, no mester di “landbijdrage” mas, awo nan mes tin un maneho sostenibel.
Esaki ta apenas un lista chikito di e logronan recien di gobierno. Den e siguiente articulo mi lo sigui elabora riba e logronan concreto di gobierno pa pueblo por tuma nota cu ta hopi mes tabata haci y logra pa nos pais dushi sigui recupera y avansa.
