Na un ciudad di algun miyon habitante manera Miami, tin algo cu ta resalta y tin di haber cu Aruba. Nos ta papia aki di un obra di arte di e artista Nelson Gonzalez. Y e obra ta identifica loke ta Doral. Director di Headlines Group Mark-Benson Denz ta na Miami y a combersa cu Gonzalez riba e obra “Migrante”.
Den e combersacion a bini dilanti cu e obra ta un proyecto cu a cuminsa cu ne tres aña pasa. E proceso pa e haya e oportunidad aki a dura un aña y mey. Tabatin un lista di 350 participante den un “Open Call” pa e obra cu tambe tabata den e careda pa haya e chens di crea un escultura cu ta keda pa eternidad den e ciudad di Doral.
E proceso a hiba na escogencia primeramente di 50 finalista, y despues a baha esaki na 10 y 3 finalista. Gonzalez a resulta e ganado absoluto di e prome “Open Call” pa arte publico den e ciudad di Doral.
Por medio di e obra e kier identifica e terminologia di “inburgering” den un solo piesa. E ta representa e rol cu e inmigrante tabatin den fundeshi di un ciudad hoben manera Doral. “E nificacion di e proyecto aki ta bay mas leu cu un obra di arte publico. Den e ciudad di algun miyon di hende tin dos monumento dedica na migracion. Uno ta Monumento al Inmigrante cu ta na Tampa (Florida) y Monumento al Migrante cu ta papia di e persona cu ta yega of ta bay.”
Loke cu Gonzalez a crea ta un escultura di brons pa e ciudad di Doral. Y e ta masha gradici cu e Fundacion Atopia Aruba pa dun’e e oportunidad pa produci e piesa di arte aki na Merca. E ta sinti cu su trabou ta pone Aruba den spotlight, pero tambe trabou di otronan manera Gilbert Senchi y su fundacion cu ta opera creando arte publico pa Aruba.
Por bisa cu e proyecto ta un convenio di diferente fundacion cu por mira como un regalo pa Aruba, despues cu e tin mas di 20 aña bibando riba teritorio Arubano.
Despues di e proceso den cual el a pasa aden pa gana e “Open Call” a tum’e un poco mas cu un aña pa traha riba e escultura mes, cu ta encera e procesonan di construccion y restauracion, pero tambe e parti di logistica cu ta encera prepara tur cos pa move un obra di brons cu un peso di 1.8 ton, for di teritorio Colombiano pa esun Mericano. “Esaki tabata un mal necesario, pasobra e obra di arte tambe ta pasa den un proceso migratorio. Esaki ta nifica cu e tambe mester a pasa den e “paperwork”, atende cu e permisonan y control. E ta un forma pa agrega poetica na un monumento cu tambe tin su documento di identidad, nacionalisa na teritorio Mericano. Esey ta parti di e concepto.”
Despues di un aña y mey tur cos tabata cla pa e escultura por bay “residencia” na Legacy Park na Doral. Legacy Park ta un parke hopi bishita. E presentacion publico (semi priva) di e obra a tuma luga na inicio di siman. Aki ta caminda cu a presenta kico e proyecto tabata y con el a resulta, pero no a instala e obra mes ainda. Presente na e ceremonia tabata Bo-Joe Brans, Consul General interino y Hefe di Asuntonan Economico di Consulado General di Reino Hulandes na Merca.
Ainda falta dos fecha importante den e proceso pa e obra ta haya su atencion. Den luna di juni awo ta spera di por instala e obra y riba e fecha di 18 di december, cu ta Dia Mundial di Migrante, haci algo pa crea conexion entre e monumento y e fecha aki. “E ta un oportunidad pa crea espacio pa intercambio entre “sisters cities” y ciudad di Doral. Por spera exposicionnan, charla, intercambio culinario, unda por sincronisa e interes di Aruba pa difusion di su cultura riba un teritorio amplio grandi manera Merca.”
Henter e proyecto aki tabata posibel danki na cooperacion di diferente fundacion di arte na Aruba. Pero tambe ciudad di Doral cu a kere den un proyecto y no den un un individuo, y Aruba cu semper a brind’e oportunidad pa expande.
Nelson González
Nelson Gonzalez ta un artista contemporaneo (1979) naci na Maracaibo, Venezuela, y ta residencia riba e isla di Aruba desde 2003.
El a studia na Academia Neptali Rincon, den e area di arte grafico experimental. Na mesun momento el a sigui Pedagogia Integral di Arte di FIDEC Maracaibo. El a presenta su prome solo show na Maracaibo cu su 16 aña.
Nelson Gonzalez a inicia su carera internacional cu su 20 aña y awendia e ta profila internacionalmente como artista contemporaneo, curator y productor di proyectonan artistico hibrido y transdisciplinario. Cu su 22 aña di carera e tabata fundado di Taller Estudio La Tintota 1996, SINFA. Sint Nicolaas Foundation for the Arts Aruba 2003; Art Rap Foundation Aruba 2008; El PRAN Projecten base na Aruba, Corsou, Santo Domingo, Habana 2020.
Actualmente e ta dedica na e plataforma EL PRAN Projecten pa socialisa pensamento contemporaneo. Y a desaroya via di e plataforma un sistema pa midi e sectornan creativo den Caribe Hulandes. Coleccion di dato, virtualisacion di patrimonio y formalisa creacion di Garia Nacional di Arte Virtual Aruba.
Ultimo añanan Gonzalez a compila un agenda di exposicion entre Oranjestad, Ciudad Doral y Santo Domingo República Dominicana.
Ciudad Doral
E origen di nomber Doral ta union di e nombernan di Doris y Alfred Kaskel. E pareha na 1950 a cumpra 2400 acre di tereno cu e soño pa construi un hotel y un cancha di golf cu nan a yama “Doral Country Club” (funda na aña 1962).
Doral a crece poco poco te ora cu na aña 2003 e habitantenan a vota pa incorporacion di e ciudad como un municipio independiente di condado di Miami Dade. Asina nan a cuminsa ricibi persona di diferente pais di origen Latino, entre nan: Cubano, Venezolano, Argentino, Mexicano, etc
