E grupo di acrobacia “Ritmo Cubano Company” RCC Aruba lo participa den Budapest Circus Festival. Un competencia internacional di circo na Hungria, representando Aruba. E festival di circo internacional aki, ta den e top tres festivalnan di circo mundialmente. E huradonan ta consisti di doñonan den e industria di circo mas renombra internacionalmente, manera entre otro Cirque du Soleil.
Na Budapest Circus Festival ta participando circo di 29 diferente pais y RCC Aruba ta representa Pais Aruba. Prome cu e competencia internacional, RCC Aruba a participa durante lunanan di october y december 2021 den un Tour na Budapest, dunando presentacion tur dia y alabes promoviendo pais Aruba.
RCC Aruba ta consisti di Diego Emilio Garzon Sierra, Juan Camilo Aguillon, Jhon Freddys Badillo, Juan Felipe Marin Rios y directornan Diego Jaramillo Ospina y Yamila Hernandez Ramirez.
Minister Xiomara Maduro ta desea e Grupo di Acrobacia RCC Aruba na nomber di Gobierno y comunidad di Aruba, hopi exito na e Budapest Cirucs Festival y ta gradici nan pa e tremendo trabou cu nan ta haci pa promove Aruba den tur nan presentacionnan.
