Siman a habri cu Gabinete Wever-Croes II a reuni cu e asociacion di supermercadonan Chines. Prome Minister Evelyn Wever-Croes, Minister di Husticia Rocco Tjon y Minister di Enseñansa Endy Croes a reuni cu shete comerciante Chines.
Locual a resalta ta cu; e Minister di Economia Geoffrey Wever y Minister di Finansa Xiomara Maduro kende netamente t’e dosnan cu tin di haber cu fondo di nos pais y pa stimula economia, no tabata presente den e reunion. A haya masha straño cu minister-president tabata sinta memey di dos minister cu no tin mucho conocemento ni di economia y tampoco di finansa.
E tres mandatarionan a haci apelacion na e asociacion pa; nan baha prijs di producto den supermercado p’asina trece alivio den pueblo. Aunke di otro banda, ya pueblo ta sangrando cu aumento di prijs di awa, coriente, schoolgeld y den futuro cercano BBO.
Gobierno lo aumenta BBO di 6.0% pa 7.5% pero en realidad comercio lo cobra pueblo 8.1% di BBO debi na e maneho di cobra ‘tax on tax.’ No por confirma si e reunion tabata fructifero of no, mirando prijs di fleta tambe a aumenta drasticamente debi na e desaroyo internacional.
Tin algun asunto cu no ta ni den man di e supermercado ni di gobierno: e retonan den “supply chain” y aumento di prijs di fleta mara na aumento di prijs di combustibel. Pues e mesun producto a subi di prijs drasticamente, prome cu e yega Aruba. Y pa colmo, Gobierno ta cobra impuesto di importacion riba tur e aumentonan aki tambe, hayando mas placa cu a presupuesta. Y ta ey e Minister di Finansa por hunga un rol, pero como cu e no tabata presente, ta bira dificil pa Gabinete Wever-Croes II baha impuesto pa e supermercadonan. Pasobra na final di dia, ni Minister di Enseñansa ni tampoco Minister di Husticia no por baha belasting pa ningun comerciante.
