Un rato pasa habitantenan den e districto di Santa Cruz y den bario di Balashi a experencia un otro interupcion di coriente. Pa e habitantenan, esaki ta un asunto serio pasobra net a pega soño y ata awo a keda sin coriente. Y tur esaki ta bin despues di un dia largo di blackout.
Elmar a sigura cu e fayo ta cerca nan mes y no ta na WEB y como tal no tin nada di haber cu e blackout di awe marduga. Te ainda no a localisa e fayo pa por drech’e. Tecniconan di NV Elmar apenas a sali pa e area pa purba yega na origen di e fayo.
Asina cu logra descubri e fayo, lo “by-pass” e pa por brinda suministro normal di coriente bek. Con largo lo tuma, no ta conoci. Pasobra mester topa cu e fayo prome ainda.
Awe 4:47 am Aruba a experencia un blackout cu a dura te 11:57 am, pues mas di shete ora sin coriente. Cu awo anochi atrobe tin fayo y perdida di coriente ta bin na mal momento y ta cay di masha mal gusto. Clientenan riba red social ta acusa NV Elmar di a stroba nan di drumi ayera nochi y awo ta stroba nan di pega soño atrobe. A corda e tecniconan cu mucha tin scol mañan, pues pa nan haci nan best pa por reconecta suministro di coriente mas pronto posibel.
