Dialuna merdia, Minister Presidente Evelyn Wever-Croes a combersa den un noticiero di radio caminda el a comparti mas detaye di e ekiponan di funcionario Hulandes cu ta na Aruba pa realisa diferente proyecto relacion cu e ehecucion di Landspakket. E mandatario a indica cu esaki ta un trabou cu ta andando continuamente.
“Manera bo sa e landspakket ta un palabracion cu a haci cu Hulanda na 2020. Hulanda a bisa mi ta presta boso placa, pero mi kier pa Aruba sali di e pandemia mas fuerte y mas resiliente. Ya cu, si tin otro crisis, por atende cu ne mas facilmente. E palabracion cu a haci den cuadro di Landspakket ta cubri diferente area,” asina e mandatario a indica.
Por ehempel, ta cubri e area financiero di nos finanzas publico pa e ta mas robusto; cu ta mas flexibel ora cu mester tuma un decision y cu por carga e gastonan di gobierno. Tambe tin e area di gastonan di personal y reorganisacion; cua ta tarea cu un gobierno mester haci si of no. Riba e terenonan aki y esun di belasting, tin roadmap traha, segun Premier Wever. Pa cu esaki tin plannan riba termino largo di unda kier yega y kico ta e stapnan cu mester tuma na caminda.
