E dia di awe ta importante p’e democracia di Boneiro. P’esey pa 10:00 am e Gezaghebber di Boneiro den compania di su casa a presenta na e edificio Goddard, unda el a haci su votacion.
Edison Rijna, Gezaghebber di Boneiro, a expresa cu na Goddard el a deposita su voto pa Eilandsraad y despues di merdia e lo vota na Rincon. Como gezaghebber el a scoge pa split su votamento y asina e por mira con cos ta canando den e diferente urnanan. Den careda di 9:30 am ya caba 5% di e hendenan cu a bay vota, pero e ta spera e porcentahe subi mas cu e eleccion anterior, unda cu e pueblo ta vota masalmente. E ta conseha tur hende pa bay vota na tempo, aunke e urnanan ta keda habri te 9:00 pm. E ta haci un suplica pa yega na tempo y asina ey no mester para den rij largo anochi cu riesgo cu hende ta keda sin vota.
El a informa cu den Conseho Electorado Supremo na Pasangrahan (Censo) cu despues di 12:00 pm tin e urna di cual nan tabatin e intencion di hacie mobil. Pero a opta pa pone na Pasagrahan. Eynan tambe ta bira un urna unda por yega pa haci voto.
Na Pasangrahan, tur hende cu no a haya nan carchi di voto pa un of otro motibo, por yega eynan pa mira si esaki ta duna bek na Burgerzaken. Eynan tin tur e carchinan di voto y asina por mira si e ta eynan. E ta lamenta cu diamars te cu 12:00 pm manera ley ta stipula, por a saca un duplicado di carchi voto. Si e persona no por haya esaki na Pasangrahan, no tin posibilidad di saca un duplicado.
Algun urna a habri cu algun problema chikito, pero despues tur por a habri. Un di nan tabatin poco rij y hende no por a vota mesora, pero a soluciona esey. Na tur urna tur cos ta cana bon. Tanto riba e website www.boneirutavota.com como media social tin tur informacion. Gezaghebber Rijna a conseha un y tur pa bay vota.
Tin Kiescollege pa Eerste Kamer di Hulanda como den Conseho Insular. Segun Rijna, pa Conseho Insular tin un total di 16300 persona pa vota, mientras pa Kiescollege tin 14200 persona cu tin derecho di voto. Den ora di mainta rond di 700 pa 800 persona a vota caba, pero e ta spera cu por yega na un cantidad respeta cu ta duna e cantidad di persona cu ta representa e isla den Conseho Insular y Kiescollege na Hulanda. Tin un total di diestres urna cu hende por pasa vota.
E conteo no ta di awe so. El a splica cu esaki ta algo nobo, pero den ora di anochi nan lo duna resultado dje cantidad di voto pa partido. Aki por mira cuanto voto un partido a haya y diahuebs nan lo duna conteo pa candidato. Asina ey tur hende lo por haya sa cuanto voto cada candidato a haya.
