Mayoria di e miembronan di FTA ta bin di e sector hotelero, e sector cu ta wordo impacta mas lihe den e crisis aki di coronavirus. Segun presidente di e sindicato Federacion di Trahadonan di Aruba (FTA), Hubert Dirksz, ta kere cu berdad e decision pa cera frontera ta un bon decision, sinembargo di un otro banda ainda tin cu warda un periodo di 14 dia pa wak si tin berdad contaminacion of contagio entre persona pa persona na Aruba mes.
Ban spera cu esey ta minimo of no ta e caso at all. E ora ey cu ta duna un espacio pa bo prepara bo mes, haci miho prevencion y ban wak cu for di ey economia por cuminsa draai bek.
Si na Aruba no tin mas di e virus aki, e ora ta un oportunidad pa forsa e economia draai toch. E problema ta hopi grandi. E problema ta cu na momento cu mester manda un cantidad di trahado cas pasobra no tin trabao, segun e sindicalista, partidonan mester yega na un acuerdo.
Den e caso aki no ta sin mas dunado di trabao por djis impone riba trahado bisa nan cu ta bay cas y esey ta tur. Of tin un leave of absence imponi. Partidonan na unda cu tin sindicato, mester yega na acuerdo cu doño di trabao. Sigur vakantie ta un posibilidad pa laga tur trahado, tur empleado bay cu vakantie, pero esaki mester ta den un forma balansa.
Na momento cu trabaonan cuminsa bek, e trahadonan ta bay haya nan cu problema sin vakantie y esey por ocasiona dificultad. Entre otro trahadonan ta bay cansa, nan ta meld ziek. Tur e situacion cu por presenta despues di esaki, ta e ora ey lamentabel. Tin chens awor aki pa balans’e y no pasa pa bay tuma tur dia di vakantie.
E otro cos ta, si yega asina leu cu hende mester keda cas pasobra no tin trabao, en principio e tin derecho riba salario.
Pero di un otro banda no ta trahando y e compania no ta ricibiendo entrada. E ora tin cu yega na otro. Di parti di FTA tin planeando y ta combersa cu hopi compania, tin di nan por carga 100% di salario pa e periodo, pero e otronan no. Y riba esey e discusion mester bin. Con ta yega na tuma un decision y kisas gobierno ta apoya esaki pa henter pais, pa tur trahado, incluyendo aparato gubernamental, cu un porcentahe ta wordo kita.
Esey ta duna espacio pa tur compania haya un break, incluyendo gobierno y tur trahado ta haya entrada. Pero mester tene cuenta cu tin hopi compania cu ta chikito, cu no ta wanta pa carga ningun luna di salario, ni na 100%, ni na 90, 80 of 70.
Dirksz ta sigui enfatisa cu tin un situacion dificil pa e companianan aki, pero tin trahadonan tambe cu tin salarionan abao cu bo no por mishi cun’e sin mas. Manera cu e baha na un nivel cu no ta yega pa mantene su mes, bo ta bay hayabo cu situacion social, problema social ta aumenta. Esey ta un preocupacion.
FTA ta kere cu partidonan mester sigui combersa. Es decir gremio comercial, gremio sindical, incluyendo e sindicatonan di e aparato gubernamental y gobierno mester sigui combersa y yega na un entendimento mas lihe posibel. No por laga esaki keda liber na e companianan mes of e trahadonan mes tuma decision of pleita y yega na un caos na diferente empresa y sector. Mester tin liderazgo y yega na un bon entendimento pa asina ey por stabilisa pa pasa e temporada aki, pone tras di lomba.
