Awe trempan un truck di Compra N.V. a yega cu e prome cahanan di frutanan Ale cu ta forma parti di e campaña Fruta na Scol. E prome scol pa ricibi fruta bou di e programa aki tabata Scol Paso pa Futuro. E programa aki ta un iniciativa di Compra Ltd. y Tropical Ale
Tabata e director di Compra Hubert Dirksz, kende a entrega e prome caha den man di minister di Enseñansa Rudy Lampe.
Minister di Enseñansa a splica cu tur scol preparatorio y scol di Enseñansa Special ta haya tur siman un fruta. E programa piloto lo tin un duracion di 40 siman. “Danki na Compra N.V. cu a tuma e iniciativa pa contribui pa yega na un scol mas saludabel.”
E mandatario a bisa cu esaki ta un inicio pa conscientisa muchanan cu fruta, berdura y tur loke ta di mama tera ta importante pa nan salud, e mandatario a bisa.
Dirksz a expresa di ta contento di a haya cooperacion di minister di Enseñansa. Na momento cu a presenta e proyecto, mesora el a bay di acuerdo. Tur cos a bay hopi lihe pa cuminsa cu e programa. E ta algo conoci na continente Europeo. Nan ta di e pensamento cu si un mucha na chikito siña come saludabel, e chens ta hopi grandi cu na grandi e ta sigui cu e ritmo di come saludabel.
A bay na en total 35 scol cu ta encera en 3477 mucha y 148 klas. Nan lo haya riba tur diabierna un bacoba. “Compra kier coopera pa siña e muchanan come saludabel. Esaki ta un bon comienso y ta spera cu mas compania sigui e iniciativa. Ban percura pa muchanan prome cu tur cos,” director di Compra, Hubert Dirksz, a expresa.
