No ta prome biaha cu e mandatario, encarga cu maneho di asuntonan social y labor di nos pais ta opera. E tin algun aña caba ta luchando contra un reto cu su cuero, cu ta pone cu cada pasa tanto tempo e mester oper’e pa kit’e for di su curpa. Tur esaki pa evita cu e benigno por bira maligno.
Den pasado Glenbert Croes a yega di haci intervencionnan medico den otro pais tambe, buscando un di dos opinion. Pero, pa e ultimo añanan e ta den man di dr. Charlene Oduber, specialista di cuero, cu ta brindand’e cuido y conseho con pa bringa e reto aki cu ta sali na varios parti di su cura. E operacion di ayera tabata specificamente na su cara.
Por lo pronto, e specialista a ordena e minister pa e keda cas y descansa su curpa. Tin un proceso di recuperacion cu ta sigui despues di un operacion asina, aunke cu e tabata un dagopname. Pero, no por sali den solo ni por yega na cushina den e dianan aki despues di e operacionnan.
Entretanto minister Glenbert Croes ta oficialmente cu AO y tin un reemplasante cu ta sigui cu su trabounan di tur dia. No ta prome biaha cu e mandatario mester keda cas e ultimo lunanan pa rasonnan medico of pa cuarentena ora cu miembronan di su ekipo den oficina a contagia cu Covid-19.
Ta bon pa informa cu na Aruba, enfermedad di cuero ta esun mas popular riba nos isla, specialmente cu por desaroya cancer. Probablemente esey ta bin debi na e solo cayente cu ta briya tur dia riba nos isla. Of tambe e hecho cu nos ta somete nos mes na solo sin tene precaucion. Mayoria hende ta hunta suntan lotion solamente ora di bay lama pero no ora di bay trabou.
Ta nota di basta tempo caba, cu na un forma regular minister Glenbert Croes ta bisti sombre of pechi ora e ta riba caya. Tambe ta nota cu e ta bisti un flanel bou di su camisanan. Tur esakinan ta formulanan pa evita solo, debi cu su cuero ta delicado.
Nos ta desea minister Glenbert Croes pronto recuperacion.
