Diamars den oranan di atardi Aruba Sport Unie (ASU) por medio di su Presidente Gerald Franca a haci entrega di un plakkaat di reconocemento na e baluarte di deporte, specificamente Softball, Francisco “Chipen” Chirino. E ceremonia a tuma luga na cas di Chirino na Companashi.
E baluarte aki for di añanan ’60 bin ariba tabata envolvi den baseball, specificamente little league, y despues el a pasa pa softball, despues di a coy varios titulo. El a dirigi na varios ocasion seleccionnan di Aruba di Little League y Junior League, Franca a splica. “E ta un persona cu merece tur respet y reconocemento. E ta un persona cu a dedica henter su bida na hubentud di Aruba y deporte. Mi ta sinti’mi hopi orguyoso di ta sinta banda di dje y recorda e momentonan di gloria cu nos a comparti.”
Chirino mes den un forma humilde, a conta cu el a cuminsa den deporte cu su 9 aña, ora cu el a lanta un team di baseball den e bario di rancho y a recorda legendarionan di baseball y softball cu a hunga den su team of a entrena. E tabata hopi emociona cu e reconocemento y a bisa cu nunca el a traha pa haya reconocemento, sino pa e muchanan por yega na escena mundial di deporte.
Un di su pupilonan, Karel “Cai Cai” Williams tambe tabata presente na e ceremonia. El a papia di tur e logronan di Chirino tanto den baseball como softball, ekiponan cu a coy campeon pa 14 aña den baseball y otro seis aña sigui den softball. El a gradici cu Aruba tabatin un persona asina den comunidad pa traha pa hubentud.
