Dialuna 19 di Augustus ultimo e aña academico 2019-2020 di Universidad di Aruba (UA) a cuminsa pa e studiantenan di Organization, Governance and Management (OGM).
Anualmente ta cuminsa cu un programa di introduccion pa tur studiante di OGM cu e titulo “Back-to-Study-Days”. E actividad aki ta un programa di dos dia caminda tur studiante ta haya informacion general pa por tin un aña exitoso. E prome dia (13 di Augustus) a duna un introduccion na tur studiante di prome aña. E studiantenan den prome aña a haya informacion general pa nan por cuminsa nan “bida” di studiante na Universidad di Aruba. 
Riba e di dos dia, esta dialuna ultimo tur studiante a haya informacion di e curiculo, reglanan di examen y reglanan di registracion pa examen. Tambe a tene un ‘mercado’ di modulo caminda cada modulo tin su seccion y docentenan a duna un resumen di e modulo y e tarea (nan) final pa e studiantenan por haya interes y ta mas prepara pa cuminsa. Ademas di e modulonan, e studiantenan a haya informacion di OGM club pa studiante (StuCo) y e studiante Sidney Simoons a presenta e siguiente evento di e club cu ta un biahe educacional pa Washington DC na October 2019. 
Tur aña tin un ‘’motivational speaker’’ y e aña aki e motivational speaker tawata Diego Acevedo. Sr. Acevedo a trata tres tema cu ta curiosidad, pasion, y perseverancia. Tambe e la papia di e necesidad pa desplega curashi den bida pa logra bo pasion, soñonan y metanan. Den su caso ela laga su trabao riba nivel internacional como ingeniero anto e la dicidi di bay bek scol y studia sostenibilidad. Cu sosten y comprension di su casa ela bay bek scol y awor e tin su propio compania cu cliente internacional. Na final di su discurso Sr. Acevedo a pidi studiantenan pa haci bon uzo di e oportunidad cu e estudio di OGM ta brinda nan. 
Tambe Sr. Acevedo a enfatisa cu nos tur por impacta mundo di un manera of otro. Ela bisa tambe cu bida no ta un careda cu un hende so ta gana. Ora cu un hende gana si nos haci’e corecto nos tur ta gana. E la pidi studiantenan pa analisa tur cos cu nan por siña, pa na ta critico y pa nan compronde cu no ta tur hende ta pensa mescos. E team y studiantenan ta gradici Sr. Acevedo pa su presentacion cu tabata sumamente interesante y educativo. Tambe ta desea tur studiante di Universidad di Aruba y di Aruba henter tur clase di exito pa 2019 – 2020.
