Frakshon di MAN pa medio di esaki ta reiterá ku nos sektor petrolero ta di krusial importansia I ku mester hasi máksimo esfuerso pa salbaguardiá esaki.
Den e kuadro aki na opinion di Frakshon di MAN Gobièrnu mester hasi tur loke ta na su alkanse pa garantisá kontinuidat di nos refineria. Gobièrnu, Parlamento i tur enbolbí debeno solamente e trahadó di refineria, pero komunidat kompletu un solushon duradero pa e retonan ekonómiko, sosial i di medioambiente nos dilanti. E proyekto di modernisashon di e refineria ta di krusial importansia i p’esei mester hasi tur loke ta na nos alkanse pa logra e mihó resultado posibel. Frakshon di MAN ta di opinion ku konstrukshon di un refineria nobo na un otro sitio mas adekuá, si esaki resultá di ta faktibel, ta un solushon ainda mihó ku esun di modernisashon.
Konstrukshon di un refineria na un otro sitionan te hasta nifiká un "Game changer" pa nos pais. Ta nifiká ku por habri posibilidatnan grandi pa aktividatnan ekonómiko nobo, fortifikashon di aktividatnan ekonómiko eksistente, kresementu di nos ekonomia, kreashon di kuponan di trabou duradero i un mihó kontesta pa e retonan riba tereno sosial i ambiental. Pa frakshon di MAN no ta kuestion ku mester bai laman ku GZE a todo kosto. Tin sierto asuntunan en kuantu GZE ku ta eksigí i meresé klaridat. Frakshon di MAN tambe ta haña ku ta masha importante pa GZE riba término korto duna e informashonnan nesesario. Pero ta eksigensianan ku Gobièrnu mester atendé na mesa di negoshashon. Gobièrnu mester pèrkurá pa ta un partner konfiabel. Echo ta ku tin un “Binding Heads of Agreement” (HoA).
No ta algu ku e Gobièrnu aki a firma, pero ku ta un realidat si.
Frakshon di MAN lo a deseá pa a atendé ku e proyekto di forma diferente for di un inisio. P’esei MAN e tempu ei, a pidi pa wanta ku firmamentu komo ku no tabatin tur informashon. Gabinete Rhuggenaath a firma un “addendum". Na e momentunan aki ta hasiendo e “Due Dilligence” i ta imperativo pa finalisá e e proseso aki di forma profeshonal. Mester kanalisá e prosesonan kumbiní deligentemente pa asina GZE por kumpli i asina prueba faktibilidat di e proyekto na su posibel sosionan i Gobièrnu Chines pa di e manera aki determiná si e kompania Chines aki por ehekutá e proyekto aki. Frakshon di MAN ta di opinion ku mester di e klaridat aki riba término masha korto. Desèmber 2019 ta djis tras di porta. Pa frakshon di MAN ta masha importante tambe pa kumpli ku e moshon di Parlamento kaminda a primintí di duna informashon kada 3 luna na representantenan di pueblo pa asina henter Parlamento i pueblo tin informashon di desaroyo di e proseso. Éksito di e proyekto aki ta di tal magnitut ku e ta surpasá interesnan polítiko partidista. Frakshon di MAN ta ekstendé un man na Gobièrnu, un man na demas frakshonnan den Parlamento i un man na pueblo di Kòrsou en general pa huntu hiba e proseso aki na un final satisfaktorio.
