Sociaal Verzekeringsbank (SVb) ta encarga tambe cu e pakete di Cesantia. E ta algo cu a crea den ley pa proteccion di trahadonan. Pa si dado momento un compania kier retira un trahado, sin motibo, e no ta bay man bashi tampoco.
Den tempo di pandemia ta hopi compania mester a dal nan porta cera of a bati bancarota. Esaki ta nifica manda trahadonan cas. Apesar di e situacion ey, e director di SVb, ir. Edwin Jacobs, ta bisa cu e instituto a sali practicamente ileso di e situacion aki. “Nos a pasa den un periodo di pandemia cu nos a sali relativamente ileso for di dje. Ora cu pandemia a cuminsa, nos a pensa cu hopi compania lo bay failliet y na final esey no a pasa. El a keda un fondo solido, fuerte,” Jacobs a bisa. Loke cu a yuda pa mantene e fondo na bida tambe ta e loonsubsidie, mientras cu e demanda pa haci uzo di e fondo di cesantia no tabata asina grandi.
Awo tin mas o menos 22 miyon florin den e fondo di Cesantia.
Jacobs a splica cu SVb ta evaluando si ta bay conseha Gobierno pa reforma e sistema aki. Kisas introduci na luga di Fondo di Cesantia un seguro di desempleo. E no ta algo pa mesora awo, sino pa den futuro. Mester studia bon si por logra yega na algo asina.
E pregunta di hopi hende ta con ta yega na e placa pa e Fondo di Cesantia crece. Pa ley e doño di trabou mester paga anualmente pa cada trahado un suma di 40 florin. Si un compania tin 50 trahado, e tin cu paga e ora tur aña un suma di 2000 florin.
Mirando cu Aruba tin rond di 40 mil trahado, esaki ta nifica cu cada aña e fondo ta ricibi rond di 1.6 miyon florin.
E aña’ki a yega di haci uzo di Fondo di Cesantia, pero no mucho. Segun por a compronde, rond di 100 mil florin.
E idea ta pa na momento un persona perde trabou e no cay den un gap grandi. Awor esnan cu perde trabou ta bay busca ayudo den forma di onderstand. Pero cu e sistema nobo, e personanan aki ta bay haya un beneficio temporal.
Esaki ta un proyecto cu no tin un fecha di introduccion ainda, y tampoco ta conoci si e idea ta pa keda cu Cesantia y duna e beneficio despues. Of ta elimina e Cesantia y crea herment di beneficio aki na banda.
Tocante SVb
A funda Sociale Verzekeringsbank (SVb) na aña 1960 pa administra e ley di pensioen di biehes (AOV). Na 1965 a expande e tareanan di SVb cu introduccion di e ley di pensioen general pa viuda y huerfano (AWW). Na 1966 un otro tarea adicional a bin pa SVb ora di introduci e ley di seguro di malesa (ZV) y accidente di trabao (OV). Finalmente pa 1983 a keda institui un fondo di cesantia pa garantisa e compensacion di trahado den caso di retiro involuntario.
Durante cu Aruba tabata forma parti di Antias, SVb na Aruba tabata un filial administrativo mientras cu gerencia y maneho tabata tuma luga na Corsou. Desde Status Aparte, SVb a para riba su mes y a desaroya den un institucion clave den nos red di proteccion social. Cu inversionnan den su recursonan humano y su experiencia acumula durante e periodo di crisis y boom economico y tambe di cantidad di poblacion, SVb awe ta un institucion cu ta lora independiente, cu un maneho corporativo eficiente, un servicio atento y cu un gran sentido di responsabilidad.
Ir. Edwin Jacobs ta na cabes di SVb y riba dje tin e Minister di Salubridad Publico y Turismo, mientras cu nan ta conta cu un Hunta di Supervision, den cual tin representacion di gobierno, gremio sindical y comercial.
