Diadomingo den careda di 6:30 pm a pidi presencia di polis na Nuñe. Polis a hay’e confronta cu dos diferente asistencia na e mesun cas ey. Ta papia di aglomeracion, fiesta, bebemento y finalmente bringamento.
A constata cu un hoben politico di partido HTC a haci aña y a invita algun amigo pa celebra cu ne na su apartament. Aunke cu reglanan vigente di gobierno pa maneha contagio di Covid-19 memey di e pandemia ta prohibi bishita na cas pa motibo social.
Durante e prome asistencia caba polis a bisa e invitadonan cu mester bandona e cas y cu no por tin aglomeracion di ningun forma. Asina mes, a opta pa no respeta e instruccion di autoridad, lo contrario, a bebe mas te cu e fiesta a caba na pelea. Polis a constata cu ta un pareha a haya problema na e fiesta y a cuminsa bringa cu otro. Contal cu e bringado mes no tabatey mas ora polis a yega.
Pero asina mes, cumpliendo cu e reglanan vigente, polis a pidi e ocho invitadonan na e fiesta pa nan bandona e sitio mesora. Esaki ta un maneho nobo, pasobra den otro casonan, polis ta detene tur hende hiba ward’i polis pa ey duna nan un multa. Den e caso specifico aki, e invitadonan na e fiesta tabatin mas suerte!
