Irma Hironimo, propietario di CocoLoco Beach Bar, ta sinti cu polis ta abusa di nan poder. Segun Hironimo, polis a yega na su luga y menasa clientenan cu ora cu nan sali for di e bar, lo detene nan. Polis a menas’e di dun’e boet, sin a sikiera midi e decibel. El a sigura di a midi esaki pero polis a bis’e di no tabata interesa.
Irma Hironimo ta denuncia, cu a yega di pasa cu polis ta bebe eyden bou di ora di trabou. Nan ta pasa bebe redbull cu vodka y ta pidie pa basha e alcohol den e bleki di redbull pa sconde esaki.
Su mensahe na Minister Andin: “Wak con bo ta haci cu e cosnan cu bo tin ta traha.” E comerciante ta cansa y ta sinti cu e polisnan no sa e protocol. Polis a bisa nan tambe, cu lo takel e autonan cu t’ey dilanti mientras cu clientenan ta comiendo den su luga.
“E cos aki no ta bay keda asina, ta basta cu abuso”, tabata palabra final di e propietario.
E señora sinembargo no a menciona cua polis, ni di cua districto ni ki tempo esaki a sosode. Tin mas cu 400 polis uniforma ta traha na Aruba y ta fastioso pa pone un mancha scur riba tur. Probablemente e departamento cu ta atende investigacionnan interno den polis lo mester scucha e keho aki, pa sa cua polis ta exigi barnan riba e strip turistico pa duna nan alcohol gratis, pa nan keda bon cu autoridad. Ta un acusacion basta serio cu merece un investigacion serio tambe.
