Tres persona a sali ganado di nan talento presenta durante Un Canto pa Nos Himno diabierna anochi na Plaza Betico Croes, cual tabata completamente yen di hende cu a bin disfruta di e dushi evento aki. E aña aki ta bira di 27 aña cu ta organisa e festival aki, como un tipo di ‘warm up’ na caminda pa celebra nos Himno y Bandera 18 di maart.
E ganadonan:
Di 1 luga: Edward vd Biezen.
Di 2 luga: Karena Maduro
Di 3 luga: Shermine y Sherdel Maduro
Jessica Croes, Organisador y presidente di funcacion cultural di festivalnan folklorico ta conta nos cu e anochi tabata uno hopi grandi. Tabata tin 30 tent di cuminda, cos dushi, artesania y mas. E tabata un anochi hopi bunita mes. A pesar cu no tabata tin hopi participante, e tabata un exito competo. “Mi kier a gradici tur persona, tur sponsor, e huradonan cu e trabao dificil, e diferente boluntario y gruponan di baile, grupo di scout, tipico colegio, gobierno y ministernan, pasobra e ta un festival hopi grandi y nos so no por logra organis’e.”
E ta un festival cu a cuminsa hopi chikito na Club Trappers cu mas o menos 100 hende, cual awe a bira un festival hopi mas grandi. Edward v/d Biezen ta bisa nos cu e cancion cu el a canta tabata skirbi pa Nilo Vrolijk, aregla pa Jaydrick Croes. E tabata un composicion cu Jonathan Croes mester a canta pero pa motibo cu e ta studiando afo e no por a bini.
“Di eynan a sali e idea pa ami por interpret’e. Nos a haci nos best y bay cu e titulo maximo,” segun Edward. Karena Maduro a bay cu segundo lugar, y tambe ta su di dos biaha ta participa den e evento. “Di berdad mi kier invita tur cantante pa anima pa otro aña. E festival aki ta hopi mas grandi cu e aña aki. Ta un Rubiano orguyoso,” Karena ta bisa. Shermine, cu su yiu Sherdel Maduro a bay cu di tres premio y nan ta contento. “Pasobra manera semper nos ta bisa, nos ta bin pa presenta y duna pueblo tur cu tin di nos, y asina el a bay tambe, hopi bunita,” Shermine ta expresa.
