Como parti di e cultura Rubiano na Aruba nos ta celebra e temporada di fin di aña den un manera unico. Aki ta referi na nos custumber di toca y baila dande pa henter e luna di december. Esaki a bira algo mas cu un custumber caba ya cu, e ta forma parti di ken nos ta como un comunidad uni. Mas cu claro, semper ta curasha un y tur pa demostra nan talento den e forma di arte aki cu ta unico rond mundo. Asina a tene e di 48 Festival di Dande di Adulto dia 29 di december 2021 na Centro di Bario Tanki Leendert. A percura pa celebra esaki den gran forma, teniendo na cuenta tur e medidanan relaciona cu COVID-19.
Den transcurso dje anochi tabatin varios participante cu a acudi pa deleita e pueblo cu nan bos y nan bon deseonan p’e aña binidero. A pesar cu no tabatin presencia di un publico, e comunidad Arubiano por a gosa di esaki den comodidad di nan cas cu un experiencia virtual. E anochi a culmina cu un monarca pa aña 2021 di nos dushi Festival di Dande.
E titulo maximo p’e categoria femenino a keda den man di Emilenne Boekhoudt-Maduro, kende awo tin e titulo di Reina di Festival di Dande 2021. El a comenta cu esaki ta di dos biaha cu e ta participa y prome biaha cu e ta hiba e titulo maximo, aña pasa el a sali na di dos luga. Asina el a sigui splica cu pa hopi aña el a contribui na nos dande, tanto den categoria di adulto y di mucha. Aunke su deseo tabata pa canta pa un publico, aña pasa tambe tabata virtual, toch el a opta pa entrega tur cu tin y mas cu claro e ta sumamente contento cu e resultado.
P’e categoria masculino Jonathan Croes a bira e Rey di Festival di Dande 2021. Esaki ta marca e di tres biaha cu Croes ta hiba e titulo maximo y a splica cu cada biaha tabata un momento special. Locual el a splica ta cu semper tin competencia fuerte y cu ta te ora anuncia ta ken a gana bo por sa en berdad. Locual a haci e festival aki uno mas special ainda, tabata e hecho cu su dande tabata uno di speransa y mirando e tempo dificil cu ainda Aruba ta pasando aden, el a dicidi di desea e pueblo forsa pa por sali hunto di e situacion y sigui Aruba pa dilanti.
Pa cobertura mas amplio lesa edicion di TREMPAN mañan.
