Famia ta un retrato di Cristo y su Iglesia, matrimonio a wordo institui door di Dios. Tur hende ta bini for di un famia. Tur hende na mundo a nace for di un homber y un muhe.
For di den paraiso e diabel a bini ta bringa matrimonio y famia, y te cu dia di awe su atake riba famia y matrimonio no a termina pasobra diabel ta odia matrimonio , cual ta e institucion precioso di Dios,
Awendia nos tur por nota con hende ta wordo uza pa kibra famia di otro, den tur forma, uzando tur tipo di strategia diabolico, faltando respet y temor di Dios.
Si bo wak bon rond cuanto motibo tin awendia pa hende divorcia, bo ta keda asombra di nos sociedad.
Pa sabi cu hende por bira, cuanto cu ciencia y tecnologia por aumenta, tur famia mester bolbe bek na caminda di Dios, pasobra awor mas cu nunca e tempo trabahoso ta manifesta su mes.
· Aumento di inmoralidad, y malicia.
· Aumento di violencia relacional y domestico.
· Aumento di uzo di droga y alcohol.
· Aumento di orguyo y arogancia.
· Crecemento formal di amor pa placa.
· Aumento di perversion.
· Aumento di ingratitud.
Tur esaki ta para skirbi den 2 Timoteo 3 :1-9 den cual Apostel Pablo kier habri nos wowo pa nos ta lanta y pa asina nos no haya sorpresa di e malvado, pero pa nos ta firme den oracion.
Tur hende cu scoge pa decencia, puresa, santidad, humildad y mas cu tur cos dominio propio, ta wordo poni un banda pasobra nan no ta pas den e ambiente di “Biba y laga Biba”.
Tur esunnan cu ta biba den e boluntad di Dios, teniendo respet y dignidad pa nan mes y nan famia y matrimonio , ta wordo mira como hende anticua.
Ta parce manera hende a lubida locual e Palabra di Dios ta bisa;
Esposanan sea sumiso na boso mes esposo,manera na Señor. Pasobra e esposo ta e cabes di e esposa, mescos cu Cristo tambe ta cabes di e iglesia.( Efesionan 5:22).
Esposonan, stima boso esposanan , y no se amarga contra nan.( Colosensenan 3:19).
Den tur matrimonio mester tin un cabes cu Dios a estableci, corda bon cu ta Dios a establece e homber como cabes di e muhe den matrimonio.
Pesey den tur tipo di matrimonio caminda hende ta pone nan mes,como cabes, ta ilegal dilanti di Dios. ( Dios tene misericordia pa tur locual hende kier establece for di boluntad di Dios).
Pasobra ta masha importante, pa un matrimonio ta den e boluntad di Dios, pasobra matrimonio ta entre un homber un muhe y Dios.
Laga nos tur corda bon cu henter bijbel ta papia di matrimonio entre homber y muhe y Dios no ta ekiboca su mes. For di Genesis te cu Apocalipsis ta esey so ta wordo presenta na henter mundo.
Awor awendia pa hende bay contra palabra di Dios ta masha facil, pasobra si bo no ta reconoce Dios, como bo Redentor y Salbador ta masha facil pa bo bay contra Su Palabra usando tur tipo di fabula .
Mescos boso esposonan , biba cu boso esposanan cu comprension, manera un vaso delicado,como cu e ta hende muhe y dun’e honor como co-heredero di e gracia di bida,pa boso oracion no wordo stroba.( 1 Pedro 3:7)
Lesa aki e claridad di e palabra di Dios, hende por wordo informa cu matrimonio a wordo estableci pa Dios entre homber y muhe.
Ta un mandato di Dios pa un homber casa cu un muhe esey ta Matrimonio.
Sinceramente, Pastor Marcel Balootje.
