Diabierna ultimo Federacion di Trahadonan di Aruba a scoge un directiva nobo durante nan di 24 congreso. Aki a apunta mr. Hose Figaroa como presidente di sindicato F.T.A. Den cuadro di esaki, Figaroa a bisa cu su prome deseo pa e organisacion ta pa mantene un posicion fuerte como partner di Aruba, specialmente mirando e retonan cu a bin na cla pa e situacion economico cu Aruba ta aden debi na e pandemia.
No obstante, Figaroa a splica cu tin oportunidad como sindicato pa crece como tambe tarea pa e crecemento aki bay den forma corecto, pues pa e trahado ricibi su ‘fair share’. P’esey den nan conferencia prome cu e congreso, nan a enfoca riba e proteccion di e derechonan di e trahado, sigur awo cu tin demanda pa felixbilacion riba mercado laboral. Como sindicato, mester percura pa proteha e derechonan di e trahado pa evita cu e trahado ta esun cu ta sali perhudica den esaki.
Pa loke ta trata F.T.A. su plan di trabou pa e proximo tres añanan, Figaroa a splica cu nan kier amplia nan miembrecia, pues pa e sindicato sigui crece pa asina haya un bos mas fuerte den comunidad. Banda di esaki, tin plan pa restructura e sectornan maneha denter di F.T.A. Tambe kier bay fortifica y traha riba formacion di delegado.
Pa cobertura mas amplio lesa edicion di TREMPAN mañan.
