Den e sector HORECA ta biba un preocupacion riba e echo cu ta considera pa cobra impuesto riba tip. Nos a acerca gremio y sindicato riba e asunto aki pa nan punto di bista. Ta cuestiona con lo controla y kende lo mester raporta na DIMP cuanto cada trahado a haya na tip den su man of riba e cobransa den un bar of restaurant of e bell captain cu ta yuda carga maleta pa huesped di hotel. E taxista tambe kier sa cu si e cobra 15 dollar pa un trabou y e pasahero pag’e 20 dollar, con e mester yena e 5 dollar adicional cu a regal’e pa su servicio excepcional.
Federacion di Trahadornan di Aruba (F.T.A.) tambe ta hayando pregunta for di nan miembronan. Ta sinti cu gobierno, den cierto forma, kier coba den cartera di trahadonan.
Presidente di F.T.A., mr. Hose Figaroa, a splica cu na algun momento a bin c’un proposicion riba mesa pa e impuesto specifico aki. Sinembargo, e sindicato no a ricibi ningun confirmacion di esaki, pues cu no ta conoci si e ta forma parti dje reforma fiscal ainda. P’esey, e hotelnan cu ta afilia na F.T.A. no a haci ningun modificacion n’e sistema di paga tips, pero tampoco ta wanta ningun suma di belasting riba tips.
Di unda e informacion aki a bini e sindicato no sa. Segun Figaroa, nan no tin mas informacion riba e parti aki. F.T.A. a cuminsa busca via diferente canal pa haya confirmacion si dicho impuesto riba tips ta den e pakete di reforma. E sindicato no a haya ningun confirmacion y lamentablemente te ainda tur cos ta speculacion.
E reto riba plac’i tip ta manera un cuchiu cu ta corta ambos banda. Di un banda e trahado lo prefera pa e keda secreto y pa e ta un suma di placa cu ta drenta su cartera “clean”sin paga belasting riba dje, mientras cu di otro banda si ta uza e entrada aki na banco ora di cera un hipoteca of cumpra un auto nobo. Pues, ta desea di uza y aplica e plac’i tip riba nan salario pa luna of cuincena, depende e circunstancia. Si ta pa banco fia mas placa e ta bon, pero si ta pa paga impuesto no. E discucion ey ta reinando pa algun aña caba.
Di loke fuentenan yega na e decision a informa ta cu e evaluacion semper tabata riba e tip “oficial”. Esey ta locual e cliente ta paga via credit card of adelanta na e compania y cu e compania na su turno ta pone riba slip di e trahado. Ta boga pa haci e entrada adicional aki como parti di salario mensual di e trahado y e paga impuesto riba dje. Sino e realidad financiero ta keda hopi diferente riba papel. Pasobra, por ehempel, un waiter den hotel ta cobra salario minimo, mas o menos Afl. 1800 pa luna. Pero trankilamente e ta cobra Afl. 2.200 extra na tip. E compania ta paga impuesto p’e riba 1800 florin en bes di 4000 florin cu ta su entrada den realidad. Con cu bo mir’e, e trahado ta bay banco y pidi un fiansa basa riba entrada di 4000 florin pero na DIMP ta paga impuesto solamente riba 1800 florin.
Parce cu e suma di placa cu e turista ta duna e trahado “cash” den su man no ta parti awo di e plan pa cobra impuesto riba dje.
