Presion di awa por baha den districto di Noord

Water en Energie Bedrijf (WEB) Aruba N.V. a pidi atencion special for di su cliente y habitante di Noord, Alto Vista, Camay, Eagle, Boegoeroei, Turibana, Boroncana, Sero Pela, Curimiao, Bubali, Cunucu Abou, Pos Abou, Washington, Palm Beach y Saliña Cerca, relaciona cu posibel invonveniencia cu por tin den e siguiente dianan.

WEB a splica cu riba dianan 9 te cu 12 di augustus 2022, lo saca tanki di Alto Vista for di servicio pa haci algun trabou di mantencion. Consecuentemente e regulacion di presion di awa pa e barionan lo sosode cu ayudo di pompnan. No ta premira cu habitantenan lo sinti un diferencia grandi den presion di awa durante e periodo di trabou. En caso cu toch nota un cambio drastico di presion di awa, por yama Call Center na 280-4600.

Pa motibo di siguridad a dicidi di cera e caminda pa bay na e tanki, pues lo no ta posibel pa subi e caminda pa yega te na e tanki. Ta pidi un y tur pa tuma bon nota di esaki.

WEB ta haci su maximo esfuerso pa limita e inconveniencia y ta gradici di antemano pa e comprension.