Por admira un exposicion special di Gustave Nouel, inspira pa realesa ‘Oranje’, durante henter luna di april y juni, den e sala central di e ‘Stadhuis’ na Deventer. Tur hende ta bonbini na e exposicion excepcional aki, cu a cancela dos aña pasa debi na ‘Covid-lockdown’.
Gustave Nouel, e conocido artista di Aruba na Hulanda, ta mustra cu su exposicion di un serie di portret pinta y titula ‘Caranan di Oranje’ , e funcion di brug di nos ‘Cas di Oranje’ den Reino Hulandes. Lo tin un culminacion oficial riba Dia di Rey, 27 di april 2022. Intencion ta pa Oranjevereniging (DOV) hunto cu Stadhuis di Deventer, invita e Gabinete di Ministro Plenipotenciario di Aruba pa bisa algun palabra relaciona cu e ‘brugfunctie’ di nos famia Real y con Aruba ta mira esaki oficialmente.
Na aña 1992 a expone dos pintura di Gustave Nouel (www.gustavenouel.com) den e pabeyon Hulandes durante World Expo Sevilla (Expo universal na Spaña) y na aña 1993 Nouel tabata e prome artista di Deventer cu a realisa un exposicion individual na Sibiu, dunando Masterclass na artistanan profesional di Rumania, durante un intercambio cultural oficial. Esaki tabata auspicia pa Conseho Cultural di Deventer, cu apoyo di WVC na Den Haag. Royal Talens a sponsor tur material pa e masterclass.
Artista profesional Gustave Nouel tabatin mas cu 200 exposicion y hopi proyecto artistico internacionalmente. Den Hall of Fame, na e potret di Gustave Nouel ta colga entre e dies Arubianonan mas famoso di tur tempo. Mientras e ta na bida.
(https://kreolmagazine.com/culture/art/gustave-nouel-a-modern-art-virtuoso)
Gustave Nouel, ta un artista famoso Caribeño, cu educacion academico y post-academico, specialista den pintamento di portret. Como ‘street-artist’, Gustave Nouel a sketch y pinta portret riba caya, riba plasanan hunto cu artistanan di henter mundo y tambe na ferianan di arte internacional y otro actividadnan artistico, na diferente pais. Esaki a permitie desaroya un curso elemental y universal y comparti hopi secreto pa pinta portret, tanto internacional como den su region.
Na Royal Talens Apeldoorn, el a duna un tayer nacional di potret. Royal Talens tambe a mustra interes pa coopera cu intercambio cultural y otro proyecto artistico den nos Reino. Gustave Nouel lo inicia un curso intensivo di pintura di potret pa artista avansa na Kunstcircuit (www.kunstcircuit.nl), un centro di arte importante regional. E evento ta riba diasabra 9 di september proximo. Tin algun luga ainda. Artistanan interesa tambe por bin riba un ‘wachtlijst’ pa september. Pa inscribi, ‘wachtlijst’ of pa mas informacion: [email protected]
