Giants Aquatics Aruba ta un idea cu a cuminsa na aña 2019. E fundado, Jordy Groters, tabata sinti y tabata kier a mehora e mundo di landamento competitivo na Aruba. Awor ta asina leu cu e tin un directiva completo pa guia e organisacion. Nan ta Zuleika Fernandes-Silva como presidente, Richard Flanegien como vice-presidente, Roraima Arends como tesorero y Kim Kelders como secretaria. Jordy Groters tambe ta forma parti di e directiva como miembro fundado.
Coach Jordy a cuminsa cu su carera di landamento cu 8 aña di edad. Su dedicacion y perseverancia den e deporte y mehoracion constante a yud’e sigura su mes cu lo acept’e den un programa di landamento di division 1, unda el a completa su Bachelor den ciencia den Parks, Recreation and Tourism, cu enfasis riba Sport Management y un minor den Bussiness na University of Missouri. Durante tur e añanan ey, el a biaha, competi contra y papia cu hopi atleta y coach. Asina el a siña hopi tecnica innovativo, metodo y poniendo nan tur den practica pa su mes. Door di su mesun experiencia y mirando e posibilidadnan, e kier a trece tur su conocimento bek pa su isla.
Jordy a dicidi pa cuminsa oficialmente cu su mesun club di landamento na comienso di e pandemia na januari 2020. E mester a nabega den un mundo cambiante y un comunidad cu landamento stagna riba e isla. Manera por imagina, esaki a trece varios desafio y descurashi cu ne. Sinembargo, manera e ta hiba cu ne e fuerte creencia, cu si bo tin un pasion, bo mester keda pusha. Pa dos aña Jordy a maneha e club mayoria biaha su so.
E head coach y fundado a proba su talentonan, cu a resulta den un crecemento exponencial den e club. Esaki a conduci cu a bira casi imposibel p’e continua ta maneh’e su so. E siguiente paso tabata pa solicita asistencia di hende confiabel, cu ta comparti su metanan y tin e interes di e atletanan y e deporte na pecho.
Na februari 2022, a acerca cuater individuo pa forma e directiva di Giants Aquatics Aruba. E mision y vision di e club a bira cla y ta como lo siguiente: mehora e mundo di landamento competitivo na Aruba, pa medio di sostene e bienestar di e atletanan y nan sistema di suporte, educa atletanan riba deportividad y tecnica en general, forma un comunidad sigur y inclusivo, desaroyo general di atletanan y coachnan como hende na prome luga y despues atleta.
