Dialuna atardi, dia 15 di april, di 6:00pm pa 8:00pm tin apertura di e exposicion di cuadra di Corina Coray, titula ‘The trip of my life’ na Biblioteca Nacional Aruba. Ta presenta un coleccion di 30 obra di Corina Coray den Sala di Exposicion y esaki ta habri henter siman durante orario regular di biblioteca.
‘The trip of my life by Corina’ ta un actividad pa haci fundraising pa ‘Fundacion Adopt an addict’. Un fundacion cu ta trata na ofrece solucion pa adiccion di droga na Aruba. Ta presenta un ‘biahe fascinante’ cu ta duna un bon bista di e desaroyo artistico di Corina Coray.
Ken ta Corina? Corina ta e artista cu ta presenta e exposicion. Corina a nace na Basel, Suisa na 1975. Corina (un Geminis) a nace cu cerebral palsy. E ta hopi sensitivo pa musica y pinta cuadra y cu su talentonan e ta drenta y bira parti di e mundo magico di arte.
E ta ekipa cu un spirito bibo y ta bringa pa su desaroyo propio. Su compañera ta su mama cu ta dun’e guia pa biba un bida rico y yen como un persona cu limitacion fisico. Awor e ta comparti su obranan cu comunidad demostrando di e manera aki kico ta posibel pa libera bo mes di limitacion y gosa di e libertad di expresion.
Publico ta bon bini na biblioteca pa wak e exposicion.
