Diamars mainta seis studiante di Universidad di Utrecht, den colaboracion cu Santa Rosa y Universidad di Aruba a presenta nan proyecto “Rainwater Harvesting”, esta coleccion di awasero. E studiantenan a enfoca ariba un solucion sostenibel pa un di e retonan mas grandi cu Sector Primario ta enfrenta: e falta di awa.
E falta di awa ta un desafio constante pa cunukeronan local, y e solucion pa colecta awa di yobida directo ta presenta un oportunidad pa obtene awa di manera eficiente y sin gasto adicional. Durante nan presentacion, e studiantenan a investiga y discuti varios metodonan y strategianan pa optimalisa e uzo di awasero. Nan presentacion a resalta e importancia di practicanan sostenibel den maneho di awa, ofreciendo solucionnan cu por mitiga escasez di awa y promove cuido di nos medio ambiente.
Actualmente Aruba tin awa di suela (grondwater) pa cuater mil persona so cual ta 0,04% di nos poblacion. Esaki ta sin tene cuenta cu e demanda enorme di awa pa e sector turistico. Pues e investigacion ariba coleccion di awasero ta accentua e rol vital cu awa ta hunga pa e desaroyo sostenibel di nos pais, particularmente den e sector primario.
Segun Minister Ursell Arends, encarga cu Sector Primario, “nos isla por transforma su mes di un paisahe di desierto pa un oasis. E iniciativa di rainwater harvesting ta un paso importante den e direccion ey, na un manera sostenibel pa medio ambiente.”
Minister Arends ta extende un palabra di gradicimento na e studiantenan pa nan esfuerso, na Santa Rosa pa guia futuro profesionalnan den area di sostenibilidad, y na Universidad di Aruba pa fomenta colaboracion interinstitucional.
