Den e weekend di 2-3 y 4 di december tras di lomba a tuma luga e prome coaching clinic di USA Baseball na Aruba. Un weekend dedica na mehora e deporte di baseball na nos isla. Ariba diabierna atardi a tuma luga e ‘Meet and Greet’ na Local Store, cu ta permiti e coachnan local cera conoci mas di cerca y combersa cu e coachnan di USA Baseball. Den un ambiente ameno a presenta e cuater coachnan y asina e evento a ranca sali.
Ariba diasabra dia 3 di december e prome sesion a start na Universidad di Aruba pa 12:05pm en punto. Mester remarca cu a conta cu presencia di 70 coach, di diferente organisacion na Aruba, di cual dos tawata femenino. Durante e sesion aki a elabora ariba diferente aspecto, p.e. infield, hitting, base coaching, outfield, pitching y baserunning. A pesar cu e sesion a dura 5 ora y a dedica na e parti teoretico, e preguntanan y interaccion tawata di aplaudi, esaki a cay den masha bon tera cu e coachnan di USA baseball. E esfera tawata uno positivo y yena cu energia. Mas importante ta demostra cu e coachnan ta eynan pa sigui desaroya nan mes como coach. Sin duda algun topico lo tawata nobo, y un refresh pa otronan, pero sigur tur hende presente a siña durante e prome dia aki. Na final di dia a obsekia tur cuater coach un bunita recuerdo di Aruba.
Aruba diadomingo pa 9:00am di mainta e segundo sesion a inicia na stadion di Nadi Croes/Crismo Angela y coachnan mester a subi veld pa asina por wak y pone den practica kico a siña e dia prome. Nos tawata tin e honor di tin Randolph Oduber, miembro ehecutivo di WBSC, como participante. El a join durante ambos dia den su rol como coach. E solo a briya fuerte, pero participantenan a perdura te cu e final, ricibiendo nan certificado di participacion.
Elston Figaroa, president di Aruba North Little League a subraya: “Esaki tawata e prome clinica, pero nos ta sigur cu lo no ta e ultimo. E coachnan di USA baseball tawata sumamente satisfecho cu e organisacion y e participacion di e coachnan local. Y nos a ricibi bon comentario di nos coachnan local.”
Tawata admirabel pa wak tanto coach biniendo hunto pa bienestar di e deporte y e muchanan. Ariba e imagen por admira un mensahe scondi: si nos traha hunto, nos tur ta logra Sigur un danki di curason na tur participante / coach, e oradornan di USA Baseball, tur instancia cu a yuda nos pa trata nos huespednan lo miho posibel, y mas cu claro e team di Aruba North Little League.
