Pa clausura e aña Fundacion Pa Nos Muchanan (FPNM) den colaboracion cu Reach Your Goal Foundation (RYG) a organisa e evento Ban conecta caminda cu e workshop titula: Team Building : Aim for Higher a ser duna. E workshop aki a tuma lugar diasabra, 26 di November 2022 na Alhambra Ballroom. Cabesantenan di diferente Centro di Cuido di Mucha a presenta pa un dia yena cu informacion y actividadnan practico. Meta principal di e dia aki ta pa reenforsa e cabesantenan cu diferente strategianan pa fortalese e union dentro di nan team. Esaki ta forma un clima di trabou ameno y saludabel cual tin un efecto positivo ‘riba e muchanan cu nan ta cuida diariamente.
E dia a ser parti den dos. Den e prome parti a enfoca riba e importancia di Maneho y pa esaki RYG a duna un presentacion cu informacion y tips cu por incorpora y implementa den e maneho diario di e Centro di Cuido di Mucha. Tambe a haci diferente tareanan cu lo por uza como un herment pa aclaria y preveni diferente malcomprendimento den team.
E topiconan trata ta entre otro, “walk the talk”, “Be pro-active”, “Choose request over complaint”, “Manage your own growth” y Become a “STAR” for your team.
Den e di dos parti a pone enfoke riba bon comunicacion y liderazgo. E parti aki tawata uno hopi activo na unda cabesantenan a participa na diferente weganan y alavez siña traha riba fortalese e laso y trahamento hunto den team.
E workshop a clausura cu un tarea unda cada cabesante mester a resumi e dia door di crea un pintura hunto. Despues cada grupo a haya e oportunidad pa presenta esaki.
Un cabesante di centro di cuido di mucha tin e tarea importante di dirigi, maneha y motiva un team di trahador pa asina hunto carga e responsabilidad di e cuido optimal di nos muchanan den centro. Un trabou cu no ta facil, pero alavez hopi bunita y di hopi importancia, cu e workshop aki henter team di FPNM kier a contribui y motiva tur pa sigui cu e bunita trabou.
E centronan di cuido cu a participa tabata: Angel Speelschool,Bee Blessed Daycare, Building Bright Beginnings, De Kleine Rups, Den mi Cabes, Dizah Speelschool, Edwientje Speelschool, Eiva Conta Storia Speelschool, Havard Kids, Happy Feet, Kerekentenchi Speelschool, Lilly Putters Speelschool, Little Dreamers, Little Explorers, Little Star, Mi Casita Felis, Mijn Schatjes, Pasadia Muchanan Contento, Pasadia Infantil Te Aworo, Peek A Boo Childcare, Pretty Flower Speelschool, Scol Amplio Nos Cosecha, Scol di Hunga Luna cu Solo, Scol di hunga Chikitin Bin Bin, Scol di hunga un mundo yen di color, Stichting Poeroenchi, Tante Joja Speelschool, The Cradle Daycare, Yupi Yupi Ya Speelschool.
FPNM ta aplaudi y gradici cada participante pa nan presencia y energia. Tabata un dia exitoso y ameno, yena cu informacion practico y bon energia!
Un palabra di gradicimento ta bay na RYG pa nan bon cooperacion, Papersisters pa nan bunita donacion y Alhambra Ballroom pa nan tremendo servicio.
