Ex prome minister di Corsou, Etienne Ys a tene combersacionnan cu tanto lider di
AVP Mike Eman, como parlamentario Robert Candelaria. E ta conta cu nan ta
comparti hopi cos hunto. Na prome luga e ideologia politico.
Tur ta democrata cristian y el a agrega cu ta contento di tende cu ainda e ta carga e ideologia na halto y den su mision cu e tin awor aki tambe pa Costa Rica. E ta un di esnan cu ta bay sali dilanti naturalmente pa sigui defende e parti ideologico di e coriente democrata cristian, algo cu ta sinti falta di dje tambe.
Esey tabata e topico principal cu a discuti diamars, con por trece bek di un manera
practico, den un manera facil, den un manera comprendibel, e ideologia ey bek den
comunidad. Por ripara cu antes hopi hende tabata kere den e ideologia ey, pero mas y mas por ripara cu hendenan ta distancia for di partido of no ta reconoce mas den partido e
ideologia ey. Ys tin contento di tende cu e parti ey ainda Eman ta luchando p’e. Di un otro banda ta interesante pa tende diferente desaroyonan na Aruba. Na Corsou tambe tin
desafionan. Naturalmente Mike Eman, un hende cu semper a lucha pa bon relacionnan den reino y bon relacion cu e islanan. Ys ta recorda cu Eman a inverti hopi tambe den esey y semper preocupa con ta bayendo cu hermana islanan.
Mescos cu Ys, e tambe tabata a trece e topico ey pa discuti, con ta bayendo cu Corsou, con ta bayendo cu St. Maarten, con ta bayendo cu BES. Kico ta e problemanan comun cu tin. Kico ta e retonan cu tin. Naturalmente tur ta wordo afecta pa desaroyonan na Venezuela, tanto Aruba como Corsou tin problema pa tene un refineria operacional. Tanto Aruba como Corsou tin issues cu finansas publico, discusion cu CFT. Ta den hopi cos en comun pa combersa y Ys ta sumamente contento di a topa cune atrobe y mirando cu e ta hopi activo, tanto riba nivel ideologico, politico, pero tambe riba nivel practico con pa yuda Aruba bay dilanti, tambe e demas paisnan den Reino.
