Recientemente a sali den publicacion riba plataforma di medianan hopi yega di actual president di SMAC, Darren van Ommeren, bisando cu SMAC no lo otorgo permiso na Stichting Musica por organisa e proximo edicion di Aruba Caiso & Soca Monarch. Ta netamente, dos plataforma di radio so a publica e noticia, pa cual, un di nan, e president di SMAC ta forma parti di e team di gerencia.
Mirando e informacion cu a sali, a busca mesora pa reaccion di tanto SMAC como Stichting MUSICA. Van Ommeren, a comenta cu e no por duna un opinion ainda riba un asunto cu no ta concretisa, sinembargo ta te cu diamars 6 di juni e reunion oficial ta tuma luga, caminda decision lo cay. Di otro banda, president di Stichting MUSICA, Edwina Werleman tampoco tabata disponibel pa duna un reaccion y ta opta pa warda e reunion tuma luga pa djey e reacciona. Mirando e envolvimento di van Ommeren y e pagina di radio cu a publica e noticia, ya por premira kico lo ta e resultado di reunion.
Mirando cu ni presidente di SMAC y tampoco di MUSICA kier comenta, a busca mesora e ex-presidente di Stichting MUSICA, esta Señor Clyude Burke. Burke ta kere cu un desicion asina ta uno descabaya. Tempo pa un stichting di carnaval tin tur poder ta pa pasado y no tin sentido. “Ta ken nan ta anto” tabata palabra nan di Clyde Burke.
Ta na Minister Asuntonan General, pa dicidi ken ta ricibi e permiso of no, awo, si a otorga e permiso general na SMAC, no ta mucho cla. Pero, e ta peligroso pa un solo organisacion tin tur poder. Si dado caso, esey ta caso, por bisa e ora cu e monopolio di SMAC por trece corupcion. Corupcion no solamente cu ta dicidi ken ta haya ki contracto, pero tambe pa regel pa hendenan hopi cerca ricibi permiso di un forma monopolio. Burke ta kere cu MUSICA tin cu para duro y bay contra SMAC. Na final, MUSICA tambe ta forma parti di SMAC. Si MUSICA tin e mandato di su miembronan cu ta participa den e festival, cualker momento por yega na un strategia pa negocia cu SMAC.
Segun e pagina di radio, cu Darren van Ommeren ta fungi como parti di e gerencia: “Tin varios incumplimento a tuma lugar di parti Stichting MUSICA”, cu esey a pone cu SMAC a bisa “TA BASTA” y ta termina relacion entre e partidonan.
