Diaranson anochi a drenta e noticia lamentabel di e fayecimento di ex politico y ex parlamentario Harry Oplaat. Oplaat a perde bataya cu malesa cu tabata afect’e ya pa algun tempo caba.
Harmen Gerrit Oplaat tabata candidato #8 riba lista di Partido di Pueblo Aruba AVP den eleccion di 2001. E tabata parlamentario pa fraccion di AVP entre 2001 y 2005. Prome cu drenta area politico, Oplaat tabata un lider sindical den sector di enseñansa y a fungi como president di SIMAR.
Coleganan di partido ta recorda como un persona recto y critico te hasta di nan propio organisacion, ora cu esaki tabata necesario.
Harry ta laga atras su casa Monica Oplaat Cervantes cu kende el a contrae enlace matrimonial na 1988 y tambe pa un yiu muhe Krista y yiu homber Stefan. Palabra forsa y condolencia ta bay pa ambos y demas famia y amigonan di e defunto.
