Siman pasa un delegacion di International Monetary Fund tabata na Aruba pa reuni cu minister. Prome minister ta haya cu e rapport di IMF ta importante, pasobra como instituto independiente, nan por confirma cu e cifranan di Aruba ta corecto.
E rapport di International Monetary Fund (IMF) ta hopi importante, asina tabata palabra di Prome Minister, mr. Evelyn Wever-Croes. E ta kere cu Hulanda tambe ta mira su importancia. Esaki ta pa dos motibo. E prome punto ta cu ta presenta e cifranan di Aruba. Si tin hende na Hulanda cu por ta no ta confia e cifranan di Aruba, awo nan tin e den un instancia independiente.
Un instancia cu gobierno no por influencia. Esey ta algo hopi importante caba. E ta importante tambe pasobra cu na Washington, Hulanda tin un stem hopi importante. Segun e mandatario, den e delegacion cu a bin Aruba, esta un delegacion di IMF, tin un persona di Hulanda. E persona aki ta e liaison entre Gobierno Hulandes y IMF.
Wever-Croes ta considera esey hopi importante, pasobra si tabatin duda riba e cifranan, awo tin un instituto independiente, mundial conoci, cu ta para pa nan y ta confirma cu e cifranan ta corecto.
