Minister di Economia ta na Hulanda pa atende un reunion na Post.nl. E mandatario ta buscando manera pa haci Post Aruba bira un compania profitable, aunke cu post internacional tin hopi presion.
mr. Geoffrey Wever, Minister di Economia, a splica cu e ta na Hulanda pa dos reunion. Un di nan tin di haber cu Post, di cual pa hopi aña tin diferente reto. E mundo di post internacional tin hopi presion y nan kier reorganisa e compania di Post. Nan kier mira con pa haci e compania mas profitable. Tur aña gobierno ta aporta 3.8 miyon florin den caha di Post pa asina e compania por cubri su operacion.
E mandatario a expresa cu durante e periodo cu e ta na mando, su deseo ta pa trece cambio den e compania estatal. E kier mira con pa hacie mas profitable y hisa su entradanan. Tambe hacie mas eficiente y busca oportunidad mas nobo.
Algun luna pasa PWC a haci un doorlichting di Post. Esey a trece algun punto interesante na luz di dia y mester atende cu nan. E mandatario a splica cu un di nan ta pa expande e negoshi cu Post ta den, otro servicio. Esey tabata e motibo cu su persona a reuni cu Post.nl pa mira con nan a transforma esun di nan. Post.nl tabata den mesun posicion similar cu Post Aruba.
Nan a converti Post.nl den un operacion moderno y e ta bayendo hopi bon den e mercado. Nan ta ofrece servicio innovativo. Esey tabata e motibo cu a acerca nan pa haya informacion con nan a haci esey y haya idea cu por implementa aki na Aruba pa asina por break even. Tambe pa haya ayudo di nan.
Gobierno tin riba presupuesto tur aña 3.8 miyon di florin pa yuda Post Aruba cubri su gastonan. E mundo di post cada bes ta bay atras. Na Hulanda, nan a mustra e mandatario con a haci ahuste den nan modelo. Esey a duna e mandatario algun idea cu aki tambe por cambia e modelo di Post.
Pa mas lesa TREMPAN.COM.
