Maneho di aviashon ta importante pa e kumpli ku tur aspektonan di seguridat, pero ta dirigí
tambe pa fasilitá vuelonan di diferente kompanianan di aviashon ku ta hasi Kòrsou aksesibel pa finnan turístiko, deportivo, karikativo, komersial i sosial.
Pa tin desaroyo ekonómiko pa Kòrsou mester tin trafikashon di hende pa i for tur destinashon pa sirbi prinsipalmente e metanan turístiko i komersial. Pa sirbi e metanan aki nos mester di un maneho di aviashon koherente, efisiente i efikas. E hecho ku nos no a logra ainda pa bai kategoria 1 bek i e echo ku nos leinan tabata un di e opstákulo pa nos logra haña un sosio stratégiko pa Insel Air, den e kaso aki Avianca, ta yena nos ku basta prekupashon ku e maneho di aviashon ku tin ainda den 2018 aki i ku si esfuersonan ku ta wòrdu hasí ta yuda fomentá un ekonomia duradero prinsipalmente den e situashon kaminda esaki ta krese di un forma negativo.
Den kuadro di e preokupashon akiriba menshoná Parlamentario pa frakshon di MAN sr Eugene Cleopa a hasi Minister di Tráfiko, Transporte i Planifikashon Urbano Sra. Mr. Zita Jesus-Leito e siguiente pregunta nan:
1. Minister por informá Parlamento kiko ta e motibu ku Kòrsou a pèrdè kategoria 1 i tambe for di ki dia a pèrdè esaki?
2. Minister por indiká kiko ta e desbentaha finansiero ki esaki tabatin pa ekonomia di
Kòrsou en general i partikularmente pa nos turismo i tambe e parti komersial?
3. A hasi un evaluashon pa sa kiko ta e motibunan ku no a logra yega na kategoria 1 ainda
apesar ku a pone fondo i ekspertonan pa realisá esaki?
4. Minister por informá kiko ta tur e prosesonan ku mester transkurí pa nos bai kategoria 1
bek?
5. Minister por informá ku tin un plan di akshon pa nos realisá esaki i si esaki ta e kaso ki
temporada tin planiá pa nos yega kategoria 1 bek?
6. Nos tin e kapasidat nesesario na Outoridat di Aviashon Sivil di Kòrsou pa pèrkurá den e
tempu definí pa nos yega na kategoria 1?
7. Minister por indiká ku si e leinan eksistente ta opstakulisá pa establesé kompanianan di
aviashon ku por pèrkurá pa Kòrsou keda ku konektividat den su region i ku demas
partinan di mundu?
8. Kiko tabata e motibunan den kuadro di e lei ku a opstakulisá ku Insel Air no por a yega
na un sosio stratégiko den e kaso aki ku Avianca?
9. Si esaki ta e kaso kiko lo bai hasi ku e lei pa esaki lo no
ta un estorbo mas den futuro?
10. Minister a traha un plan di akshon kaba kon nos lo
bai remediá e situashon aki. Si ta sí nos por haña
informashon di e plan di akshon aki?
11. Minister a evaluá ku e maneho eksistente di aviashon ta fasilitá pa Cuacao Airport
Holding (CAH) i Curaçao Airport Partners (CAP) por kumpli ku nan metanan pa asina
pèrkurá pa tin un bon “airlift” ku ta fomentá un desaroyo ekonómiko duradero?
