Durante e conferencia di prensa di fraccion di MEP, sr. Rocco Tjon a elabora riba e ultimo
desaroyonan den Cuerpo Policial. Segun e parlamentario, durante e campaña pa eleccion, e
preocupacion di mas grandi den pueblo tabata e aumento di criminalidad. Ta pa e motibo aki
tambe e combatimento di criminalidad a ser incorpora extensamente den e plan di
gobernacion actual. Sin duda cu pa combati criminalidad mester di un Cuerpo Policial bon
ekipa y cu ta funciona bon.
Alto Comisario nobo
Actualmente ta den proceso pa yega na un Korpschef nobo. Sinembargo den e proceso aki
mester tene cuenta cu Cuerpo Policial tin un structura, entre otro tin un Korps Management
Team, caminda tin tambe tres comisario. Segun e parlamentario, ora ta papia di un mando
nobo, esaki mester consisti di un of mas persona. Den pasado tabata tin caba un
‘tweehoofdige leiding’, pero mester tene cuenta si cu den un organisacion herarkico tin
decisionnan cu mester wordo tuma cu ta solamente door di un solo persona, specialmente ora cu tin un crisis. Ta hopi importante pa tin trankilidad den e Cuerpo Policial, caminda tin
intencion di bin cu un Tijdelijke Management Team y pa despues di 1 aña cuminsa werf un
Korpschef nobo.
Un bon traspaso
Sr. Tjon ta sugeri pa cuminsa e proceso awor aki caba, pasobra sino Cuerpo Policial lo keda
mas largo den un incertidumbre. Si lo bin awor aki cu un Management Team cu ta bay bin cu
su cambionan y aki un aña atrobe ta bay bin cu cambio. Cuerpo Policial e ultimo añanan a
wordo eleva na un cierto nivel. E ta un muestra di liderazgo tambe di e Alto Comisario actual
cu ta scoge un otro reto y kende ta hala un banda pa asina Cuerpo Policial por sigui desaroya
na un siguiente nivel. Loke ta hopi importante tambe ta un bon traspaso. Mester bin un fase
transitorio caminda tur e desaroyonan andando ta ser traspasa tambe pa e persona cu lo bay
asumi e responsabilidad. E proceso aki mester ta uno transparente, p’asina Cuerpo Policial
tambe por tin trankilidad.
Preocupacionnan
Alabes sr. Tjon a elabora riba e diferente preocupacionnan cu ta ser treci padilanti door di e
sindicato di polis. Esaki pa loke ta tur e kehonan cu tin di haber cu infrastructura, scarcedad
di personal, material y cu pa esaki ta tira culpa riba mando policial. Sinembargo mester
realisa cu tin cierto aspectonan cu un hefe di departamento no tin autoridad pa haci. Sr. Tjon ta boga pa a traves di ley of maneho, duna e hefenan di departamento mas autoridad. Na final di dia tur e kehonan menciona tin di haber cu e echo cu e recursonan ta keda e
responsabilidad di e mandatario y no di alto mando. Mester tin un balans kico ta e
responsabilidad di e minister y kico ta e responsabilidad di e Korpschef. Alabes sr. Tjon ta
spera cu den e tratamento di e begroting proximo lo tene cuenta cu e aspecto di recursonan cu Cuerpo Policial tin necesidad di dje.Finalmente, pa loke ta e parti di di integridad, Cuerpo Policial semper tabata tin un Maneho di Integridad, segun sr. Tjon. E maneho aki a wordo delinea pa practicamente henter e aparato gubernamental, pero e gobierno anterior nunca a implementa esaki. Sinembargo na momento di restructuracion di e Cuerpo Policial na 2011 a incorpora un departamento Bureau Integriteit en Veiligheid cu semper a funciona bon y semper a haci nan trabao manera debe ser.
