Despues di e ultimo desaroyonan, ta parce cu toch un gran mayoria den comunidad ta sostene e idea di Osyth Henriquez pa restaura Isla di Oro. Probablemente despues cu el a splica su vision detayadamente, cu mayoria ta sinti cu e idea ta bon y ta pas cu e deseo di un parti importante den comunidad. Por lo menos esey por conclui despues di analisa resultado di un encuesta teni riba e plataforma 24ora.com.
Un total di 880 persona a participa den e encuesta, di cual 750 (85%) a vota na fabor pa restaura e edificio cu den forma di un barco riba e rif. Pa drecha e pier y asina duna acceso na publico, incluyendo turista, pa haci uzo di e luga como centro di cuminda y bebida. Den comentario esnan cu edad mas avansa ta pidi pa habri e club bek, pa hende grandi por diberti den forma sano, cu banda musical, etc. Di otro banda, 130 persona (15%) a vota pa no mishi cu Isla di Oro y pa lag’e manera cu e ta como un sanctuario di bestia y di naturalesa.
Durante e entrevista cu Osyth Henriquez algun dia pasa den Enfoke, el a sigura di no tin plan pa bin cu nightclub ni bar y tampoco un hotel. Su plan ta pa reconstrui e barco y laga e isla como un sitio pa yoga, meditacion y pa disfruta di lama, cu algo di come y bebe. Riba nos pregunta con e tin pensa di saca su inversion, el a splica cu e lo haci Isla di Oro parti di su proyecto Ocean Villas na Savaneta, pues trece su huespednan eynan. Tambe cu e lo cuida e mangelnan y tene e luga limpi y bunita.
Tocante Isla di Oro
Isla di Oro ta situa na Pos Chikito. Gezaghebber Oscar Henriquez a haci su apertura na maart 1965. E desaroyado di e tempo ey tabata Dochi Oduber. Den un periodo masha cortico Isla di Oro a bira e centro di ambiente cu su fiestanan cu bandanan local y internacional. Segun añanan ta pasa e sitio a bira menos atractivo y a cera su portanan.
Den fin di añanan 80 a haci trabou di mantencion y a reconstrui e localidad. Diferente actividad a tuma luga na Isla di Oro pero atrobe a perde popularidad y interes y el a cera su portanan. Den decada 90 un grupo di inversionista kier a traha un hotel na Isla di Oro pero nunca a cristalisa.
E aña aki atrobe Isla di Oro ta bin den panorama ora e inversionista Osyth Henriquez a cumpra e localidad pa 1 miyon florin y ta desea di haci un inversion na e luga den forma do restaura e boto y hacie un restaurant y area pa medita, yoga y pa aprecia lama. El a sigura cu e no tin plan pa desaroy’e den un hotel of nada pa atrae masa di hende. Pero ta parce cu, no obstante promesa di gobierno, awo ta confronta contratiempo cu organisacionnan di naturalesa.
