N’e momentonan aki dos trahado ta pasando den un situacion basta preocupante. Esaki ta debi cu coordinado di minister kier saca dos trahado di Aruba despues cu nan a traha cinco luna y sin ricibi un pago. E dos trahadonan aki ta den un estado di abandono.
Alex Rodriguez, trahado, a splica cu nan ta victima di un abuso, pasobra a trece desde Colombia pa traha. El a expresa con a gaña nan y di tur e promesanan haci na nan. Pa cinco luna largo nan a traha pa Naipol Ramadar na STR Agriculture Aruba.
Rodriguez tabata e agricultor encarga cu e granja te cu e fecha di awe. Sinembargo, awe, 14 di april, a nenga nan e pago p’e tempo cu nan ta trahando na STR Agriculture. E unico cos cu nan kier a haci cu e dos trahadonan aki, ta cumpra nan ticket y pa nan bay. Pa cinco luna largo nan a traha duro y awo no kier duna nan recompensa pa loke nan a haci. Segun Rodriguez, e ta pensa cu e cos aki ta inhusto, ta abuso.
El a indica cu Ramadar a busca nan fo’i Colombia y a priminti nan cos. Incluso a priminti cu nan lo ricibi un salario y awe ta nenga nan e derecho como trahado, trahado di dje. Solamente e dunado di trabou kier pa nan bay bek Colombia sin pago di nan salario.
Den henter e asunto aki tin un coordinador di prome minister envolvi. Ta trata di Terry Gumbs, kende tabata e persona intermediario entre Ramadar y e dos trahadonan. Gumbs tabata presente den tur reunion y acuerdo cu nan a haci. E ta forma parti di e incumplimento na nan, pasobra e no a presenta cu ningun documento.
Gumbs semper a pidi nan pa documento, sinembargo, nunca nan a haya un carta pa sigura cu nan ta legal aki na Aruba, aunke cada bes tabata bisa nan cu nan ta legal. Awo cu nan a exigi nan derecho, loke nan a ricibi ta pasashi pa regresa Colombia sin un pago y nada despues di cinco luna di trabou. Nan no kier paga nan salario.
Pa Keyner Castro, trahado, awe mester ta un dia special pasobra ta su cumpleaños, pero ta den un situacion cu ta doloroso pa nan. Nan a bin desde Colombia lagando nan famia y amigonan. E tambe a mustra riba e echo cu Ramadar a ofrece nan un trabou, un salario pa nan biba y awo ta sali cu e situacion doloroso aki. Tur cos ta basa riba un promesa falso. Ta manda nan bek pa Colombia sin placa y permiso. Practicamente nan ta ilegal na Aruba.
A duna nan ticket di avion y no a hiba nan pa aeropuerto. Segun Rodriguez, a bisa cu lo hiba nan aeropuerto, pero di bay sin ningun un beneficio pa cinco luna, di simplemente bay bek y bisa cu nan ta di regreso, esey no ta husto. Rodriguez y Casto ta exigi pa cumpli cu nan, cumpli cu nan derecho.
Nan no tin luga pa keda aki na Aruba. Nan no tin un luga, pasobra nan tabata traha den e granja y eynan mes nan tabata biba. Nan no tabatin derecho pa sali ningun parti. Esun cu ta desea di duna nan un man por tuma contacto cu nan na 7484604.
