Ehekushon di e ‘Agènda Sosial’ mester ta e instrumento pa e hende por lanta bèk i para riba pia.
E situashon kreá dor di e pandemia di Covid-19 a trese kuné ku Gobièrnu di Kòrsou, mesora ku nos a drenta e ‘lockdown’, a tuma akshon i a kuminsá duna alivio agudo na e gruponan mas vulnerabel den nos komunidat.
Esaki Gobièrnu di Kòrsou a hasi riba su propio forsa for di presupuesto di pais Kòrsou. Asina a duna miles di persona pakete di kuminda den kordinashon ku Voedselbank, sosten den forma di karchi di komestibel i sosten efektivo pa esnan ku a pèrdè trabou. Esakinan tur komo ayudo temporal.
Rozendal ta enfatisá ku ta un realidat ku na momentu ku Covid-19 a yega Kòrsou, nos tabata tin un situashon ekonómiko finansiero hopi frágil pa algun aña kaba den nos pais i un situashon sosial prekupante.
Pa e motibu aki tambe, Gobièrnu di Kòrsou, for di na desèmber 2019, a bini ku un ‘Agènda Sosial’ pa entre otro brinda ayudo duradero i yuda e hende lanta bék i para riba pia. E ‘Agènda Sosial’ ta akapará diferente aspekto i brinda ayudo na, por ehèmpel, nos hendenan ku ta sin trabou, empoderá nos hendenan ku ta kobra ònderstant, perkurá pa miles di mucha haña kuminda kayente tur dia i ayudo na otro gruponan vulnerabel den nos komunidat.
Na momentu ku a bini ku e ‘Agènda Sosial’, a reservá e fondonan nesesario pa kuminsá ehekutá e Agènda Sosial aki. Ta krusial ku mester sigui ku su ehekushon mirando ku e ta un aserkamentu di ayudo duradero i no temporal manera e ayudo den kuadro di Covid-19.
Segun Rozendal, ku e ‘Agènda Sosial’, ta saka un man pa nos hendenan por lanta bèk mas fuerte riba pia.
Den e kuadro aki, parlamentario Rozendal a manda karta pa e minister di Desaroyo Sosial, Labor i Bienestar den kua e ke sa entre otro ki parti (nan) di e Agenda Sosial a keda ehekutá/implementá kaba, si e fondonan reservá pa ehekushon di e Agènda Sosial’ ta disponibel i kiko Ministerio di Desaroyo Sosial, Labor i Bienestar ta hasiendo pa yuda hendenan ku ta buska trabou pa nan subi bèk riba merkado laboral.
