Den un comunicado emiti pa Presidente di SADA, Edward Maduro, e ta comenta cu director di Douane, Ricky Croes, a tuma e curashi pa raport’e como Presidente di Sindicato SADA y a bay asina leu di a pidi un castigo disciplinario p’e. Motibo ta cu segun e director, Maduro lo a saca “dienstgeheim” den prensa y cu e lo a papia den nomber di e Departamento di Douane. “Esaki sigur ta algo cu nos NO por tolera pasobra aki ta bisto cu e director kier trata na silencia e sindicato.”
Maduro ta sigui bisa cu otro palabra, e director kier silencia e trahadonan, pasobra ta nan ta e sindicato y no por acepta e tipo di practica aki. Pa e motibo aki mes, directiva di Sindicato SADA ta invita tur colega, miembro y no-miembro di Cuerpo di Douane, pa asisti na un reunion extra-ordinario y importante, pa atende esaki y tambe tur otro punto di preocupacion di cual e salarisstructuur nobo sigur ta un di e puntonan. E reunion ta tuma luga diamars dia 13 di November 2018 pa 8:00am na e hoofdkantoor.
“Nos no por permiti un director trapa bo(so) derecho pa tin un sindicato pa representa bo(so). Betico Croes, Libertador di Aruba, a yega di expresa: Mas bal muri riba pia cu biba na rudia. Ban hunto mustra e director cu NOS NO TA BAY BIBA NA RUDIA. Ta basta cu e intimidacionnan di su parti.” Por ultimo a cera e comunicado bisando cu Union ta haci Forsa.
