Apreciabel redactor danki pa permiti nos sigui vocifera nos preocupacion cu ta reinando bow di e Embahadornan di Aruba, cual ta nos taxistanan, mirando cu Minister Romero no a duna importancia na loke nos a denuncia den bo prestigioso media di prensa tocante e chantage, soborno y descriminacion cu segun rumornan ta pasando den su departamento di Transporte Publico.
E silencio di Minister Romero ta mustra cu e no por contradeci un berdad of cu Minister ta hopi mal informa den nos leinan, Mal informa por wordu solushona si tin interes, pero si esei no pasa kiermeen cu e aktonan contra di nos taxistanan ta puro mala fe. Un bon gobernante lo percura pa su cuidadanonan no wordu descrimina, chantagea of trata na worde soborna pa ningun di su trahador nan den su departamentonan.
Pesei e pregunta ta keda den limbo, Minister ta bai keda den silencio y ta laga e procedura di mal informa y manipulacion continua, of Minister lo aclarea cu na ningun momento e procedura di mal informa y manipulacion tabata wordu hasi cu consentimiento di Minister? Minister ta aproba e ora cu un ciudadano Arubano taxista bow di Minister su maneho ta wordu, chantagea, soborna, menosprecia y indignamente trata?
Minister please laga tur taxista sa si Minister ta aproba loke ta pasando den su departamento di transporte, cu tur loke nos a scirbi den e articulo anterior cu Minister Romero no a duna ningun comentario mirando loke ta pasando cu taxista nan cu a jega cierto edad y cu a sirbi e pais aki pa hopi aña dunando servicio na e unico pilar economico di nos pais dignamente y honradamente.
Kisas mester hasi e pregunta poniendo nan den un lista, pues nos lo hasi esei kisas e ora Minister Romero por contesta nan tur den secuencia.
Pregunta number 1: Minister Romero ta na haltura cu taxista cu jega cierto edad ta worde jama pa un conversacion na oficina di DTP?
Pregunta number 2: Minister Romero ta na haltura cu e taxista nan aki di un edad respeta ta worde chantagea cu nan mester pasa e permiso pa nan jui of nan ta perde e permiso?
Pregunta number 3: Minister Romero ta na haltura cu e taxista nan aki di un edad respeta ta worde soborna cu nan por haya un hulp chauffeur pa dos (2) aña y despues di esei nan mester entrega nan permiso na Minister pa e dunan ken cu e kier?
Pregunta number 4: Minister Romero ta na haltura cu e taxista nan aki di un edad respeta ta worde bisa di mala fe cu nan permiso di awor padilanti lo worde renoba cada pasa un (1) aña, mientras cu ley di transporte ta bisa cu e permiso ta worde renoba pa 5 aña?
Pregunta number 5: Minister Romero ta na haltura cu e taxista nan aki di un edad respeta aki y tur taxista pa ley di transporte publico por sigui maneha na taxi y keda cu nan permiso tanten cu un dokter certifica cu nan ta bon di salud y no ta forma peliger manehando un vehiculo?
Pregunta number 6: Minister Romero ta na haltura cu taxista cu jega cierto edad ta worde jama pa e conversacion na oficina di DTP y ta worde bisa cu e mester pasa e permiso pa su jui y cu su jui of familiar
mester ta biba bow di mesun dak cu e taxista?
Pregunta number 7: Minister Romero ta na haltura cu esaki ta un ley cu a worde poni den un MB di un Minister di transporte anterior cu a worde hala aden despues pasobra e ta contra ley di transporte y contra ley nan internacional?
Pregunta number 8: Minister Romero ta na haltura cu un Hulandes naci nan Aruba, esta Arubiano, pa bin na remarke pa haya un exploitatie vergunning di taxi mester tin 25 aña?
Pregunta number 9: Minister Romero ta na haltura cuanto porciento di adulto nan di 25 aña awendia ainda ta biba na cas di nan mama cu nan tata na mesun direccion?
Pregunta number 10: Minister Romero ta siguiendo e maneho di e Minister di transporte anterior cu awe ta su partner den cualicion cu a saca e MB cu a worde hala aden?
Pregunta number 11: Minister Romero ta na haltura cu ta mesun director cu e Minister anterior di transporte a nombra cu awe ta Minister su colega den cualicion, ta director awe na DTP?
Pregunta number 12: Minister Romero no ta kere cu teniendo mesun director cu e Minister anterior a nombra cu e director ta siguiendo e maneho bieuw di purba kita permiso di e taxista nan cu a jega un edad respeta y cu kier sigui traha?
Pregunta number 13: Minister Romero ta na haltura cu e taxista nan ta den poder un exploitatie vergunning y cu compania nan di grandi di tour, auto di huur, bar, restaurant, hotel, supermercado etc etc cu
nan tur tambe tin un exploitatie vergunning di gobierno?
Pregunta number 14: Minister Romero ta na haltura cu mayoria di e doñonan di e exploitatie vergunning nan aki di compania grandi di tour, bar, restaurant, hotel, supermercado auto di huur ta estranhero, Libanes, Arabier, Surnameño, Chines, Mericano, etc….?
Pregunta number 15: Minister Romero ta na haltura cu tur e comerciante nan ei por bende nan negoshi cu cualkier persona hunto cu nan exploitatie vergunning y gobierno semper ta firma esei, pasobra ningun inversionista ta bai cumpra un negoshi estableci caba si no traspasa (overschrijf) e exploitatie vergunning di e negoshi?
Pregunta number 16: Minister Romero ta na haltura cu un taxista ta e unico comerciante cu ta netamente Arubano cu un exploitatie vergunning, y cu despues cu e kier baha cu penshun of cualkier otro motibo di salud of otro, no por bende su negoshi cu un otro persona cu ta cumpli cu tur rekisito den ley, entre otro; e doño di e exploitatie vergunning su mes mester maneha e taxi, e doño di un exploitatie vergunning di taxi no por tin mas cu un permiso di transporte esta esun di taxi, mester tin 25 aña of mas, mester ta nasi na Aruba?
Pregunta number 17: Minister Romero ta di opnion cu esaki ta un descriminacion contra un jui di tera, pasobra ley di transporte di taxi ta bisa cu bo mester ta Hulandes nasi na Aruba, esta un Arubiano y bo mester tin 25 aña of mas pa bin na remarke pa un permiso di taxi, un exploitatie vergunning, mientras cu e estranhero si por bende su negoshi cu ken cu e kier y gobierno ta pasa e exploitatie vergunning?
Pregunta number 18: Minister Romero ta na haltura cu taxista mester bai controla na SVB ora e ta malo y cada biaha mester paga Afl. 100.- y cu esaki ta un invento di e Minister di transporte anterior cu ta Minister su colega awor den cualicion?
Pregunta number 19: Minister Romero ta na haltura cu taxista ora e ta malo SVB no ta page ni un cen preto?
Pregunta number 20: Minister Romero ta na haltura cu taxista semper a uza su dokter di cas cu sa bo historia completo di tur bo malesa nan den tur e aña nan, y cu despues e Minister anterior a cambie pa taxista mester bai SVB y paga Afl.100.-?
Pregunta number 21: Minister Romero ta na haltura cu taxista ora di pidi un cita cu SVB cu no ta page ningun sen ora e ta malo hopi biaha ta dura mas cu un siman?
Pregunta number 22: Minister Romero ta na haltura cu taxista cu bira malo mester un hulp chauffeur awe y no aki un siman despues di bai SVB y paga Afl. 100.-, pasobra sin un hulp Chauffeur placa no ta drenta pa e taxista pone pan ariba mesa pa su famia y paga su debe nan?
Pregunta number 23: Minister Romero ta na haltura cu tin taxista cu specialista ta bisa cu nan no por traha pasobra nan ta bow di un tratamento pa un malesa y cu esun cu ta controla na SVB ta bisa cu si e mester bai traha, y na DTP nan ta bai tras di e palabra di esun di SVB y no e specialista?
Pregunta number 24: Minister Romero ta na haltura cu taxista aki cu su specialista a bise cu e no mester bai traha, cada biaha atrobe mnester bai
pa haya cita na SVB y bolbe paga Afl. 100.- pa bringa su caso atrobe cu carta di specialista den man, sin traha, sin tin un hulp chauffeur pero cada biaha tin cu saca Afl.100.- mientras cu SVB no ta page nada ora e ta malo (AO), Minister ta haya cu esaki ta husto?
Pregunta number 25: Minister Romero no ta di opnion cu a jega tempo pa duna e taxista (Embahadornan di pais Aruba, manera tur gobierno a jama nan) mes derecho ariba su exploitatie vergunning via ley pasa den staten, mescos den e caso di otro comerciante nan cu tin un exploitatie vergunning, cu dia cu e taxista cu a sirbi su pais pa tanto aña den e unico pilar economico di nos pais, kier bende of traspasa, mientras cu esun cu ta cumpre of haye mester cumpli cu tur ley nan vigente pa adkiri un exploitatie vergunning di taxi cual nos a menciona promer, (Entre otro cu e por tin un (1) permiso so di taxi, y e mes mester maneha e taxi) Minister na poder mester copera?
Taxista nan hopi preocupa y rabia con nan ta worde trata actualmente, ta spera cu e biaha aki si nos lo por haya contesta ariba nos preocupacion.
Sperando cu loke ta pasando no ta cu influencia di e Minister anterior den DTP, pa vengansa pasobra e taxista nan a bringa su MB cu cu lo a perhudica atrobe e tempo aya taxista nan cu a pasa edad di penshun, caminda tur peticion pa traspaso pa familiar lo a worde rechasa (afgewezen), of bari for di mesa.
Sperando cu loke ta y tabata pasando na DTP cu taxista nan di un edad respeta, cu a pasa edad di penshun, no ta y tabata sosode cu bendicion y aprobacion di Minister Chris Romero !
