Entrante dialuna 5 di april, e protocol di duracion entre e prome y di dos vacuna contra COVID-19 lo cambia na Aruba. E periodo entre e prome y di dos vacuna ta bay cambia di 3 siman, pa entre 3 te cu 6 siman. Esaki ta conta pa tur persona di tur edad cu lo haya e prome vacuna desde april.
A base di combersacion entre DVG y RIVM di Hulanda y considerando e hecho cu tur esunnan riba 60 aña cu a registra a haya 2 shot caba y ta bon protegi a dicidi adapta e periodo entre e prome y di dos aplicacion di e vacuna entre 3 te cu maximo di 6 siman.
Teniendo cuenta cu nos hospital ta yen, e contagionan ta subiendo hopi lihe, esunnan riba 60 aña cu a registra a haya 2 shot caba y nos ta ricibiendo mas vacuna, Aruba lo bay over na duna e di dos vacuna algun siman mas laat compara cu e 3 siman exacto. Analisis a mustra cu e efectividad di e vacuna di Pfizer ta keda hopi halto si e lo duna e di dos shot despues di tres siman, pero prome di 6 siman.
Den comienso di e campaña di vacunacion, DVG a duna prioridad pa vacuna mas lihe posibel e gruponan mas vulnerabel di 60+ y tambe personal trahando den cuido. Esaki tabata e motibo pa duna e di dos shot di biaha despues di 3 siman di e prome shot. Mirando e cantidad di caso positivo nobo pa dia na Aruba, e gran cantidad di caso activo y e presion riba Hospital, a dicidi di haci e maximo esfuerso pa vacuna mas hende posibel cu e prome shot.
E maneho nobo aki lo percura pa e programa di vacuna di Aruba lo ta ainda mas efectivo, door di vacuna mas persona 18+ na Aruba, mas lihe cu e prome shot. Cu esaki, DVG por cuminsa pa vacuna tur grupo di meta di 18+, incluyendo e grupo di persona cu no tin un riesgo medico. E ultimo grupo aki di esunnan 18+ sin condicion di salud lo haya afspraak a base di edad mas avansa, biniendo abou por ehempel lo cuminsa cu edad di 50 despues 40 y sigui bin abou den edad.
A dicidi cu lo aumenta nos tambe e capacidad di vacuna pa dia y lo bay habri un otro localidad. DVG lo informa comunidad debidamente di esaki dentro di poco.
