Crisis di coronavirus rond mundo tin su efecto y Aruba no ta un excepcion. Comercio a sufri grandemente y e liña di restaurantnan resortando bou di Aruba Wine & Dine nan benta a cay cu 100% cual tabata devastador, asina Fabian Lantinga, Director di Operacion na Aruba Wine & Dine a conta nos.
Gobierno a implementa un “Shutdown” pa algun siman, den cual obligatoriamente e restaurantnan mester a cera nan porta y cu apenas algun dia pasa a haya informacion cu por cuminsa start bek, pero cu diferente exigencia y regulacionnan. Pa adapta na e temporada mester a bira creativo cu diferente opcion pa por sigui sirbi clientenan y purba sobrevivi durante e temporada.
Manera ta conoci tambe Aruba Wine & Dine ta un cadena di diferente establecimento cu ta conta cu un cantidad di trahado cu ta resorta bou di nan. Na momento cu e restaurantnan a cera, a innova y cuminsa deliver cuminda, a habri “Cuminda na Cas” y Butche Box (special pa esunnan cu ta haci BBQ) a prepara un box cu tur cos aden y deliver esaki te na bo cas.
Na momento cu a informa cu por cuminsa habri bek tabata un bon noticia cual sigur a duna Aruba Wine & Dine un alegria inmenso pa asina cuminsa re-start y sirbi e clientenan local un biaha mas.
Latinga ta di opinion cu e risico local pa locual ta trata coronavirus ta na un minimo mirando cu te ainda ta papia di 3 persona infecta pero claro ta pone atencion riba e situacion na momento cu frontera habri y cu turistanan cuminsa bishita nos Isla bek. Pesey ta tuma e reglanan di DVG como un bon ehercicio pa practica bon higiena. Tur empleado ta ricibi un presentacion riba kico ta e regla pa e “Normal Nobo” y su beneficio como tambe brinda informacion na nos clientela riba e distancia social y exigencianan di labamento di man y uso di handsanitizer pa cumpli cu tur locual ta spera di nan na momento di habri.
Na tur establecimento cu ta pertenece na Aruba Wine & Dine por ta sigur cu ta aplica e reglanan, clientenan ta keda ricibi door di un Host cu lo atende na entrada y midi temperatura di esnan cu ta yega cada establecimento. Tambe ta brinda un splicacion amplio di e motibo di e flechanan di indicacion como e reglanan di hygiena.
Fabian Latinga ta contento cu por habri bek, cu por cuminsa brinda servicio di semper. Aruba Wine & Dine su cadena di restaurantnan lo cuminsa habri gradualmente cada restaurant. Mientrastanto a habri Salt & Pepper y Cafe de Plaza y Moomba Beach lo habri mas den siman. Lo busca conseho y/o datos si ta necesario for di Isla ruman Corsou mirando cu nan tin 2 siman caba habri y cu por duna nos un bista riba e situacion na momento cu turistanan cuminsa drenta bek.
Pero semper gradecido cu por habri bek, benta a cay compara cu aña pasa pero ta keda optimista cu lo surpasa e crisis aki, den mente si cu huur y utilidadnan ta keda un reto mientras gobierno ta subsidia cu gasto di empleadonan. Locual ta e deseo di mas grandi ta mira turistanan regresa bek riba nos Isla.
