Un rato pasa e 9 Parlamentarionan den Fraccion di AVP den Parlamento a firma un mocion di desconfiansa contra Minister dr. Armando “Rudy” Lampe, relaciona cu su maneho den enseñansa. Ainda no tin votacion, pero ta spera cu esey lo sosode te awenochi den Parlamento. Ta solamente si dos otro miembro di Parlamento (di coalicion) vota hunto cu AVP den e mocion aki, cu lo baha e mandatario di su puesto. Den caso cu MEP no sostene e mocion, nan lo mester adopta y sostene e maneho di enseñansa pa semper, cu tur consecuencia politico cu esey lo trece cu ne.
E reunion publico aki di Parlamento ta bin despues di hopi luna di peticion. Tur biaha a logra pa, politicamente, uzando e base di un coalicion, pa evita un reunion publico pa evita cu ta bin un mocion di desconfiansa. Pero, ta parce cu MEP mes a fada di wanta tanto presion pa e partner mas chikito den coalicion. Hunto a dicidi pa toch yama e reunion y mira den cua direccion lo bay cu ne, dependiendo e actitud di Lampe mes como Minister y di Ricardo Croes como Lider di Fraccion di RED den Parlamento.
Loading…
Reload document 
Open in new tab Tocante Armando “Rudy” Lampe
Dia 30 di Mei 2003, dr. Armando “Rudy” Lampe a funda Partido RED. Na aña 2005 a participa na eleccion prome biaha y Rudy Lampe a logra 2.334 voto individual. Den e siguiente eleccion, el a bay atras drasticamente den voto y a logra retene 1.360 voto. Den eleccion 2013, Rudy Lampe a bay atras cu mita di su votonan y a haya solamente 613 voto y den eleccion di aña 2017 a bolbe cay y yega te na 466 voto. Esaki como tal ta e record di MENOS voto cu e ta logra den su carera politico, mientras cu pa RED e ta un record den cantidad di voto. E partido a inicia na 2005 cu 3330 voto, a cay na 2009 pa 2378 voto, na 2013 no a bal mas cu 1209 voto y na aña 2017 a subi te na 4166 voto. Ironia ta cu Rudy Lampe, naci dia 13 di januari 1958, un Doctorandus den Teologia y un maestro den sociologia, ora a haya mas voto a bira Parlamentario y awor cu su popularidad ta mas abou cu nunca, el a yega na e puesto anhela di Minister di Enseñansa, Ciencia y Desaroyo Sostenibel.
