Famia a identifica e curpa di e Venezolanonan hoga como Wilfredo Jesus Vilela Marrufo di 39 aña y Jhonny Perozo Bracho, di 24 aña. Ambos a paga cada un 350 dollar na e capitan di e boto pa e transporte cu mester a hiba nan te na costa di Aruba, saliendo for di e peninsula di Paraguana.
Wilfredo no ta un desconoci na Aruba, ya cu el a yega nos isla na 2017 caba y durante su estadia como turista el a traha den construccion. E biaha ey el a dicidi di respeta e tempo cu Inmigracion a dun’e y a bolbe Venezuela. Pero poco despues el a bolbe y e biaha’ki si el a keda atras. Doño di e negoshi unda cu el a traha, tabata sper’e pa e traha como “foreman” den construccion di un restaurant, debi cu e tabata un bon trahado.
El a keda mas di un aña na e mesun luga, unda e tabata biba y traha, pa cual nan no a detene. Segun su mayornan a conta, e no tabata sali, traha y manda placa pero na inicio di e aña’ki durante un razia den construccion nan a arest’e, apesar cu el a sconde den baño. Su hefe a bis’e entrega su mes, cu nan lo pordone, pero ya nan a descubri’e. El a wordo deporta y cu e no por drenta e isla pa dos aña. Pero e tabata desespera y a empeña su auto pa e bolbe Aruba, e biaha’ki den lancha y di forma ilegal. El a logra yega, pero el a wordo deporta atrobe. E biaha’ki e lo mester spera 5 aña pa drenta bek.
E luna aki, tres siman despues cu el a wordo deporta, el a dicidi cu e ta bay purba atrobe y a empeña e portanan di su cas cu tabata den construccion pa paga e 350 dollar cu e lanchero tabata pidi pa transporta nan. Niun di su famia a mir’e sali. A reconoce e curpa di Wilfredo via potret, door di su ruman muhe Leyva Coromoto Vilela Marrufo, kende kier transporta e curpa di su ruman bek pa Punto Fijo.
Levya, di 35 aña, tambe tin 1 aña ilegal na Aruba, trahando na cas di famia. Segun el a conta, su ruman homber no tabata sa landa y e lancha a laga nan demasiado leu, door cu e motor a faya. E capitan a bisa nan tur bula na awa. Como cu su ruman a pensa cu nan ta wordo hiba te na costa, e no a bisti un salbabida. E tabata tata di dos yiu homber di 16 y 9 aña y un mucha muhe di 7 aña.
Awor e ruman kier bay Venezuela pero no tin placa pa cumpra pasashi y e kier bay cu e curpa di su ruman. Funeraria ta cobra nan 4580 florin pa saca e curpa.
E otro Venezolano Jhonny Perozo Bracho di 24 aña tambe a perde su bida huyendo di e problemanan di su pais. El a laga atras un casa y dos yiu di 1 y 3 aña. E tabata biahando pa di dos biaha pa Aruba. E prome biaha el a keda traha ilegal den construccion mas di un aña te ora cu el a wordo deporta un aña y mey atras.
El a dicidi di bolbe Aruba atrobe pasobra e tabata kier a caba di construi su cas. Su ruman tambe a bini Aruba tratando di recoge placa bou colonia Venezolano pa transporta e curpa pa Venezuela.
