A scoge Curasoleño riba Arubiano y Hulandes na Serlimar

E procedura pa recluta un Director pa Serlimar Sui Generis tabata un proceso cu a conta cu mas o menos 20 candidato cu a solicita. Ora e termino a vence, a opta pa prolonga cu un luna mas, den cual a atrae mas candidato den region pa solicita. Entre e solicitantenan tabatin varios empleado y ex empleado di Serlimar mes. Despues di un proceso di entrevista, a keda cu e 3 mihonan, cu tabata Blom di Aruba, Davelaar di Corsou y Braster di Hulanda. Tanto Blom como Davelaar ta bibando na Boneiro mientras Braster na Corsou.

E decision den Hunta di Supervision di Serlimar SG no a bay facil. Fuentenan ta sigura cu e decision no a bay unanime. E miembronan cu a vota tabata Giovanni van Wijk como Presidente, Kenneth Geo, Don de Veer y Ricky Quant. E Director nobo lo gana 20% mas cu e ultimo Director, aunke cu el a pidi pa gana riba 30 mil florin na salario. Na final a dune menos di loke el a pidi, pero mas cu standard di Serlimar.

Aunke cu den comunicado di prensa emiti pa Serlimar a dedica hopi atencion na estudio di e Director nobo, a duna poco atencion na su carera profesional, cu a conoce hopi contratiempo y polarisacion. Na Corsou e tabata conoci como pianista, cantante, compositor y areglista di Rumba Band. Ey a sali un video pornografico di dje cu un colega den banda, cu a causa cu el a haye ta bandona Corsou y bay biba na Boneiro.

Na e isla di flamingo el a bira gerente di Digicel y na un forma sorpresivo a bandona e compania. Despues el a bay traha na Bonaire Petroleum Company BOPEC y ultimo tambe el a kita den forma sorpresivo. Coleganan di Prensa di Boneiro ta sigura cu probablemente den ambos caso Davelaar a perde trabou.

Ta cuestiona con e compania Delloite a haci “antecedenten onderzoek” riba e candidato aki. Ta imposibel cu nan a papia cu Corsou y Boneiro prome cu a scoge riba tur otro candidato, entre otro un Arubiano di fam Blom cu awor ta trahando na BOPEC na Boneiro cu ta hopi miho cualifica pa e funcion. Y esaki sin conta otro candidatonan cu ya tabatin bon experencia den operacion, pero cu nan nomber ni sikiera a yega final.

Localmente, speciamente den seno di votadonan, siguidonan y conseheronan di Partido MEP, e hecho cu a scoge un Curasoleño riba tur otro Arubiano a cay den masha mal tera y a percura pa su debido critica riba red social. Nan ta boga pa Arubianonan tin preferencia den momento di funcionnan asina.