Giovanny Heyliger no kier ricibi ningun ayudo for di Reclassering pa motibo cu e no ta kere den e instancia aki. E chens cu Hues a brind’e, el a rechasa pa cual no a keda Corte nada otro cu impone un castigo di 36 luna incondicional pa maltrato severo cu a hay’e culpabel di dje.
Ta acusa Heyliger di a maltrata Richardson basta pisa dia 15 di juni, pero den Corte e mes ta bisa cu e no ta corda nada di loke a pasa y ora cu Polisnan a mustr’e potret di e victima, e no ta un persona cu e conoce tampoco.
Aunke cu e conoce, dia 15 di juni na momento cu e homber Richardson tabata saliendo di un bar na San Nicolas, el a sinti un hende a atak’e di patras cu a mand’e suela di biaha. E homber a sigui dal’e den su cara y su cabes. E resultado tabata cu el a keda cu fractura na cachete y fractura na kash’i wowo, pa cual a mand’e Colombia pa ricibi tratamento.
Abogado di e acusado a pidi pa scucha e victima como testigo y un otro persona mas. Tanto e victima como e otro testigo a expresa cu nan tin miedo, mirando e agresividad di e acusado, cu despues ora e sali e por tuma venganza contra nan.
Hues a repasa e historia di castigo di Heyliger y a constata cu e ultimo biaha cu e tabata envolvi cu husticia tabata na aña 2014 pa poging tot doodslag / zware mishandeling cometi den un pelea cu un famia di dje. Prome cu esey tambe e tabata envolvi den un caso di maltrato.
E acusado mes no a duna ningun declaracion pasobra e ta bisa cu e no ta corda nada di loke a pasa. E ta un persona cu sa traha como bouncer pa barnan na San Nicolas. Doño di e bar unda e hecho a tuma luga, tambe a wordo scucha pero e ta bisa cu e no a mira loke cu a pasa. El a sali pafo y a haya un homber tira na suela, algun hende rond, entre otro e acusado aki.
Pa Fiscal e pruebanan tabata suficiente. Aunke cu e acusado ta bisa cu e no ta corda nada di loke a pasa, pasobra e tabata basta bou influencia di alcohol, el a wordo reconoci door di e victima y un otro homber mas. Hecho ta, segun fiscal, ora cu e bebe e no por controla su mes y tampoco su agresividad. E victima no a dun’e ningun motibo pa e maltrato y niun hende sa pakico e cos aki a tuma luga.
Teniendo cuenta cu su record, Fiscal a pidi castigo di 36 luna, kitando e tempo cu el a sinta caba. Tambe a pidi pa otorga un compensacion di 8 mil florin na e victima, kende durante cierto periodo no por a traha. Ora e hecho a sosode net e tabata cambiando di trabou.
E acusado den su ultimo palabra no tabatin nada di bisa. Ora cu Hues a puntr’e pa di dos biaha si e ta dispuesto pa bay bou guia di Reclassering el a nenga. Segun el a bisa, ora cu el a sali e ultimo biaha cu el a bay cera el a acudi na Reclassering pa ayudo. Te ainda e ta sperando nan yamada. Hues sinembargo a sigur’e cu un ordo di Corte, nan mester brind’e ayudo. Despues di pensa un rato, el a bisa cu e no ta interesa. Hues a cera tratamento di e caso y a bay di acuerdo cu e demanda, esta 36 luna mas e 8 mil florin pa daño y perhuicio.
E acusado a sali di sala bisando cu “awo na Aruba bo no por defende bo mes mas”.
