Awe merdia e dos recidivistanan Deyanira Krozendijk y Chico Gang a scucha for di hues cu nan lo keda un rato mas cera na KIA, pa por paga pa ladronicia cu nan a comete algun luna pasa den Patio 15. Fiscal a subraya na hues cu e dosnan aki regularmente ta cay den man di husticia pa ladronicia, atraco y otro crimennan cu tin henter comunidad fada. Intento pa nan drecha nan bida a fracasa, pasobra semper ta opta pa practica “economia facil”, esta horta cos di otro.
Tabata riba un dialuna, dia 24 di mei 2021, cu den oranan laat di anochi e alarma a activa na Patio 15, situa den Weststraat. E sistema di camara di siguridad a capta dos sospechoso den e luga, esta e conocido Chico Gang y Deyanira Krozendijk. Nan a kibra porta drenta paden pa horta, pero no a logra haya nada di loke nan lo a kere cu lo tin den e negoshi.
Locual si nan a horta di e luga tabata dos boter di alcohol, di cual un di nan a keda atras riba e cura, ora nan a sali na careda pa scapa. A bay cu dos i-Pad tambe. Un rato despues, pa mas of menos 2:00 am, un patruya di polis a topa cu Deyanira Krozendijk drumi den Schelpstraat. Di biaha a deten’e y a transport’e pa ward’i polis. Un rato despues a detene su colega den e ladronicia, esta Chico Gang.
Hues awe merdia a condena Deyanira Krozendijk cu 18 luna di prizon, pues un aña y mey. Durante su sentencia, hues a bisa cu nan ta dunando minimo un aña di prizon pa hortamento den negoshi, den un esfuerso pa baha pisa contra e ladronnan cu ta causa panico y miedo den comunidad. Di e 18 lunanan, a dun’e seis luna condicional, pues e lo tin cu sinta un aña. Chico Gang a haya menos, solamente 10 luna di prizon, pasobra e no a drenta paden. Su rol mas bien tabata di kibra e porta y para pafo pa mira pa ningun hende gara nan.
Ta di spera cu e maneho aki lo por duna e resultado desea, pasobra cu efectonan di e pandemia, ta sinti cu ladronicia ta manera lantando cabes den comunidad atrobe. Mucho hende ta opta pa horta, en bes di traha den forma normal pa por cobra un salario digno pa por hiba un bida normal y decente. E caminda pa ladronicia ta birando mucho facil y lamentablemente ta cu un maneho represivo ta purba baha e interes aki, pasobra prevencion no tur ora ta duna su efectonan.
